«Mektepke jol» aktsııasy: Qarýly kúshterde 1700-den astam áskerı qyzmetshiniń balasy qamtyldy
ASTANA. KAZINFORM — Aıagóz qalasyndaǵy № 4 orta mektepte kóp balaly otbasylardan shyqqan áskerı qyzmetshilerdiń balalaryna mektep kerek-jaraqtaryn tapsyrǵan Qorǵanys mınıstriniń bastamasyn Qarýly kúshter túrleriniń, ásker tekteriniń, áskerı bólimderdiń, mekemeler men oqý oryndarynyń jeke quramy qoldady. Bul týraly vedomstvonyń baspasóz qyzmeti málim etti.
Barlyq garnızondardaǵy is-sharalarmen kóp balaly otbasylar, erekshe bilim berýdi qajet etetin oqýshylar, ata-analary qyzmettik boryshyn óteý kezinde qaza tapqan balalar, jalǵyzbasty analar jáne basqa da sanattaǵy muqtaj jandar qamtyldy. Birinshi synyp oqýshylaryna da erekshe nazar aýdaryldy. Olarǵa rıýkzaktar, keńse taýarlary jáne basqa da qajetti oqý quraldary berildi.
— Jalpy qaıyrymdylyq sharalary 1749 balany qamtydy. Mundaı sharalardy ótkizýge demeýshiler: bank basshylary, jeke kásipkerler, partııa qaıratkerleri jáne áskerı zeınetkerler edáýir kómek kórsetti. Árbir balanyń jáne árbir otbasynyń qajettilikteri men muqtajdyqtaryn biletin otbasymen jumys isteıtin qyzmet basshylary, sondaı-aq áskerı qyzmetshiler de shette qalmady, — dep atap ótti QR Qarýly kúshteri áskerı qyzmetshileriniń otbasy múshelerimen jumys jónindegi bólim basshysy Táttigúl Smaǵulova.
Odan bólek oqý jyly qarsańynda qyzmetter balalarǵa arnap ekskýrsııalar, kınoteatrlarǵa, murajaılarǵa jáne sporttyq is-sharalarǵa barý uıymdastyrdy. Astanada áskerı qyzmetshilerdiń otbasylarymen jumys jónindegi bólim 300-den astam áskerı qyzmetshiniń balalaryn qýyrshaq teatryna jáne elordalyq tsırkke tegin apardy.
Іs-sharalar áskerı qyzmetshilerdiń otbasylaryn qoldaý, jeke quramnyń moraldyq jaǵdaıyn nyǵaıtý jáne ata-analary Otan qorǵaý mindetterin oryndaıtyn balalardyń oqýyna jaǵdaı jasaý maqsatynda uıymdastyryldy.
Buǵan deıin habarlanǵandaı, Shymkentte 1500-ge jýyq azamat áskerge shaqyryldy.