«Mektepke jol» aktsııasynyń on kúninde 16 myńnan astam balaǵa kómek kórsetildi
ASTANA. QazAqparat - «Mektepke jol» aktsııasynyń on kúninde 16 myńnan astam balaǵa kómek kórsetildi. Bul týraly búgin Ortalyq kommýnıkatsııalar qyzmetindegi baspasóz máslıhatynda QR Bilim jáne ǵylym vıtse-mınıstri Esenǵazy Imanǵalıev málim etti.
«2015 jylǵy 1 tamyzdan bastap jalpy elimiz boıynsha «Mektepke jol» qaıyrymdylyq aktsııasy bastaldy. On kúnniń monıtorıngine toqtalsaq, 16 myńnan astam balaǵa jalpy somasy 122 mln. teńgeni quraıtyn kómek kórsetildi. Bul aktsııadaǵy basty maqsat - az qamtylǵan otbasylardaǵy balalarǵa kómek kórsetip, mektepke daıarlaý. Osyndaı sharalardyń aıasynda mektepke bara almaı júrgen oqýshylarlyń sanyn barynsha azaıtýǵa múmkindik jasalýda», - dedi E. Imanǵalıev.
Budan bólek, ol balalardy saýyqtyrý sharalaryna toqtaldy. Onyń sózine qaraǵanda, memlekettik bıýdjet esebinen bıyl mektep jasyndaǵy balalardy saýyqtyrý sharalaryna 3 mlrd. 115 mln. teńge tartyldy.
«Búginde balalarǵa arnalǵan 11 092 saýyqtyrý lagerleri men alańqaılar jumys istep júr. Bul turǵyda 1-10 synypta oqıtyn balalar sany 2,5 mln. bolsa, olardyń 60,1 paıyzy osyndaı sharalarmen qatylǵan. Respýblıkada 300-den astam eńbekpen baýlý jáne demalys lagerleri, 2 myńnan astam eńbek jasaqtary bar. Sol jerlerde pikirsaıys lagerleri jasaqtalǵan. 10 myń úıirmeler men klýbtar bar», - dedi mınıstrdiń orynbasary.
