«Mektepke jol» aktsııasyna kez kelgen elordalyq ún qosa alady
ASTANA. QazAqparat - Elordada saýda ortalyqtarynyń aýmaǵynda mektep oqýshylaryna arnalǵan kıim-keshekter men kerek-jaraqtardy qabyldaý úshin konteınerler ornatyldy.
Jyl saıyn turmysy tómen jáne kóp balaly otbasylardyń balalaryn jańa oqý jylyna daıyndaýǵa kómektesý maqsatynda elimizde «Mektepke jol» aktsııasy ótkiziledi. Shara bastalǵan 1 tamyzdan beri 1150 balaǵa kómek kórsetildi. Aktsııa aıasynda «Shapaǵat» kommýnaldyq bazarynda, «Jannur» saýda úıinde, sondaı-aq qalalyq ortalyq bazar aýmaǵynda mektep jasyndaǵy balalarǵa kıim-keshekter men kerek-jaraqtardy qabyldaýǵa arnalǵan konteınerler ornatyldy. Osylaısha, qala turǵyndary turmysy tómen otbasylarǵa qol ushyn berý múmkindigine ıe boldy. Atalǵan aktsııa muqtaj jandarǵa járdemdesýge, qoldaý qajet etetin jandarǵa meıirbandylyq tanytýǵa úndeıdi, dep habarlaıdy astana.gov.kz.
