Mektepke jol aktsııasy: 2 mıllıonnan astam balaǵa kómek kórsetildi
«QR Bilim jáne ǵylym mınıstrligi «Mektepke jol» dástúrli respýblıkalyq qaıyrymdylyq aktsııasyn ótkiziletindigin jarııalaıdy. Vedomstvonyń áleýmettik baǵyttaǵy bastamasy búkil respýblıka boıynsha 2018 jylǵy 1 tamyzben 30 qyrkúıek aralyǵynda ótkiziledi. Aktsııanyń maqsaty - az qamtylǵan jáne kópbalaly otbasylaryna, ata-anasynyń qamqorlyǵynsyz qalǵan balalarǵa jańa oqý jylyna daıyndyq kezeńinde kómek kórsetý», - dep atap ótilgen mınıstrlik habarlamasynda.
Aktsııa barysynda mektepke barmaıtyn balalardy anyqtaýǵa, sondaı-aq mektepke daıyndaý baǵytynda áleýmettik qorǵalmaǵan otbasynan shyqqan balalarǵa kómek kórsetýge basty nazar aýdarylady.
Aktsııa ótkizilgen on jyldyń ishinde 2 mıllıonnan astam balaǵa jalpy somasy 17 mlrd teńgeden astam materıaldyq kómek kórsetildi. Demeýshiler men metsenattar jalpy somasy 7,9 mlrd teńgeden astam qarjylyq qoldaý jasady. Memlekettik organdar, ulttyq kompanııalar jáne aktsıonerlik qoǵamdar jyl saıyn aktsııaǵa belsendi qatysady.
«QR Bilim jáne ǵylym mınıstrligi elimizdiń barlyq azamattaryn, bıznesmenderdi, metsenattardy aktsııaǵa qosylýǵa jáne ómirlik qıyn jaǵdaıǵa tap bolǵan balalarǵa, otbasylarǵa kómek kórsetýge shaqyrady», - delingen vedomstvo málimetinde.