Mektepke jol: 450 myń muqtaj otbasy balalaryna kómek kórsetildi

ASTANA. QazAqparat – Bıyl «Mektepke jol» respýblıkalyq aktsııasy aıasynda kómekke muqtaj jandardyń balalaryn oqý jylyna daıyndaý boıynsha qoldaý kórsetildi. Bul týraly Oqý-aǵartý vıtse-mınıstri Edil Ospan málim etti, dep habarlaıdy QazAqparat tilshisi.

«Bıyl jańa oqý jylynda respýblıka boıynsha oqýshylar sany 3 mln 500 myńnan asady. Onyń ishinde 380 000 myńnan astam búldirshin 1-synypqa qabyldanyp jatyr. Qazirgi ýaqytta el Úkimeti, mınıstrlik, ákimdikter, bilim berý uıymdary, pedagogter men ata-analar jańa oqý jylyna qyzý daıyndyq ústinde. Memleket óz tarapynan jyl saıyn muqtaj ata-analarǵa balalaryn mektepke daıyndaý úshin barynsha kómek kórsetip jatqanyn atap ótken jón. Bıyl osy sanattaǵy 450 myń balaǵa kómek kórsetildi», - dedi Edil Ospan Ortalyq kommýnıkatsııalar qyzmeti alańynda ótken baspasóz máslıhaty barysynda.

Mınıstr orynbasarynyń aıtýynsha, vedomstvo aldynda muqtaj otbasylarǵa qarjylaı kómek kórsetý jáne balalardyń bilim alý quqyǵyn 100% qamtamasyz etý mindeti tur.

«Bizde jalpyǵa birdeı bilim berý qory jumys isteıdi. Máselen, bıyl qordan oqýshylar úshin mektep formasy men oqý quraldaryn satyp alýǵa 18,7 mlrd teńge bólinedi. Jalpyǵa birdeı bilim berý qory aıasynda ataýly áleýmettik kómek ata-ana qamqorlyǵynan aıyrylǵan, jetim balalar men jan basyna shaqqanda tabysy eń tómengi kúnkóris deńgeıinen az jáne áleýmettik kómekke quqyly otbasylarǵa beriledi», - deıdi ol.