Mektepke jol: 21 myńǵa jýyq aqmolalyq oqýshy kómek aldy
KÓKShETAÝ. KAZINFORM — «Mektepke jol» respýblıkalyq qaıyrymdylyq aktsııasy bastalǵaly Aqmola oblysynda 21 myńǵa jýyq balaǵa mektepke daıyndalýǵa kómek kórsetildi.
Aqmola oblysy bilim basqarmasynyń málimetinshe, tamyzdyń 1-nen bastalǵan aktsııany ótkizýge óńir boıynsha oblys jáne aýdan ákimdikteri, memlekettik qurylymdar belsendi qatysty.
«Aktsııa barysynda „Aqnıet“ jeke qaıyrymdylyq qory balalarǵa 12 mln teńgege keńse taýarlary bar 1199 mektep sómkesin usyndy. Al Aqmola oblysynyń polıtsııa departamenti óńirdiń 81 oqýshysyna jalpy somasy 4 mln 100 myńǵa jýyq teńgege qaıyrymdylyq kómek jasady. Amanat partııasynyń oblystyq fılıaly 21 balaǵa qoldaý kórsetti. Sondaı-aq, memlekettik qyzmet isteri boıynsha agenttiginiń Aqmola oblysy boıynsha departamenti, Ulttyq bank jáne „Bereke bank“ qol ushyn sozdy. Olar keńse kerek-jaraqtaryn, mektep, sport jabdyqtary men aıaq kıim, maýsymdyq aıaq kıimder men mektep formasyn satyp alýǵa, sondaı-aq aqshalaı kómek kórsetti», — dedi vedomstvodan.
«Mektepke jol» aktsııasyn ótkizý kezinde oblys aýdandarynda (qalalarynda) 249 reıdtik is-shara ótkizildi, oǵan jurtshylyq, memlekettik qurylymdar ókilderiniń qatarynan (aktsııaǵa qatysýshylar) 112 adam qatysty.
Turmysy nashar 175 otbasy, 34 oıyn-saýyq mekemesi, 4 kompıýterlik klýb, 14 saıajaı sharýashylyǵy, 13 bazar, 9 temirjol vokzaly mańy tekserildi.
Júrgizilgen reıd barysynda 63 kámeletke tolmaǵan bala anyqtaldy, onyń 60-y — jaısyz otbasynan.
«Oblys boıynsha materıaldyq kómek alǵandardyń jalpy sany — 20 790 bala, kórsetilgen materıaldyq kómek somasy — 823,7 mln teńge. Onyń ishinde bıýdjet qarajaty esebinen 798,5 mln teńge somasyna 18 399 oqýshyǵa, bıýdjetten tys qarajat esebinen 25,2 mln teńge somasyna 2391 oqýshyǵa kómek kórsetildi», — deıdi oblystyq bilim basqarmasynyń bas mamany Baqytjan Tutqabaeva.
Sondaı-aq, oblys aýdandarynda kásipkerlerdiń qatysýymen mektep jármeńkeleri ótti.
Aıta ketsek, budan buryn Aqmola oblysynda bilim mekemesiniń basshylyǵy balany mektepke qabyldamaı qoıǵanyn jazǵan edik.
