Mektepke sý kirdi: Marat Ahmetjanov táýlik boıy baqylaýdy kúsheıtýdi tapsyrdy
KÓKShETAÝ. KAZINFORM - Aqmola oblysynyń ákimi Marat Ahmetjanov erigen qardyń sýy jertólesin basyp qalǵan Kókshetaý qalasynyń Birlik shaǵyn aýdanyndaǵy jalpy bilim beretin №22 mektepte bardy.
Oblys ákimdigi baspasóz qyzmetiniń málimetinshe, sý mekteptiń jer tólesine elektr kommýnıkatsııalaryna arnalǵan sańylaýlardan kirgen, ıaǵnı tyǵyzdaǵyshtardyń joqtyǵy sebep bolǵan. Tıisti qyzmetterdiń qımylynyń arqasynda sý der kezinde sorylyp, syrtqa aǵyzyldy. Mekteptiń jertólesine materıaldyq zalal kelgen joq, qanaǵattanarlyq jaǵdaıda. Kókshetaý qalasynyń ákimdigi mektep aýlasynda jáne odan tys aýmaqtarda sý sorý jumystaryn júrgizýde.
Osy rette, aımaq basshysy sý tasqyny jaǵdaıyn táýlik boıy baqylaýdy kúsheıtýdi tapsyrdy. Sonymen birge aýdandar men qalalardyń ákimderine barlyq mektepter men basqa da áleýmettik nysandardy tekserip shyǵý, sondaı-aq, eldi mekenderden qar shyǵarý, sý ótkizý qurylystaryn, kópirlerdi, aryqtar men sý arnalaryn tazartý boıynsha belsendi jumysty jalǵastyrý qajettigin eske saldy.
Bıylǵy jyldyń 20 naýryzynan bastap oblystyń jergilikti atqarýshy organdarynyń barlyq deńgeılerinde sý tasqynyna qarsy shtabtardyń jumysy uıymdastyryldy. Kommýnaldyq qyzmetter kúsheıtilgen jumys rejımine kóshti.
Aıta ketsek, budan buryn Kókshetaýda mekteptiń jertólesin sý basyp qalǵanyn jazǵan edik.
