Mektepke onlaın rejımde qujat tapsyrǵanda ótinimniń mártebesin tekserýge bolady

NUR-SULTAN. QazAqparat - «Elektrondyq úkimet» portalynda mektepke deıingi, bastaýysh, negizgi orta, jalpy orta jáne arnaıy bilim berý uıymdaryna qabyldaýǵa buryn berilgen ótinimniń mártebesin tekserý boıynsha jańa servıs iske qosyldy, dep habarlaıdy QazAqparat «Ulttyq aqparattyq tehnologııalar» AQ baspasóz qyzmetine silteme jasap.

« eGov.kz portalynda mektepke deıingi uıymdarǵa qujat tapsyrý jáne qabyldaý jónindegi qyzmet keńinen tanymal bolady dep oılaımyz. Sondyqtan biz berilgen ótinishterdi qadaǵalaý protsesin qarapaıym ári bárine túsinikti etýge tyrysamyz», - dedi «Ulttyq aqparattyq tehnologııalar» AQ basqarma tóraǵasy Áset Turysov.

Qyzmetti alý úshin eGov.kz portalyna kirip, avtorızatsııadan ótý qajet. «Servıster» bólimindegi tizimnen «Mektepke ótinim mártebesin tekserý servısi» degendi tańdaý qajet. Budan ári, ótinishtiń biregeı kodyn engizip, jeke kabınette, «Qyzmetterdi alý tarıhy» bóliminde sizdiń ótinimińizdi óńdeý týraly habarlamamen tanysý kerek.

Qyzmet kórsetýdiń nátıjesinde qujattardyń qabyldanǵany týraly qolhat berý jáne oqý jylynyń basyna orta bilim berý (bastaýysh, negizgi orta, jalpy orta) uıymyna qabyldaý týraly buıryq shyǵarý nemese qabyldaýdan bas tartý týraly dáleldi jaýap keledi.