Mektepke qujat tapsyryp úlgermegen jaǵdaıda ne isteý kerek

ASTANA. QazAqparat – Belgilengen ýaqytta mektep qujattaryn tapsyryp úlgermegen jaǵdaıda ata-ana ne isteý kerek? Bul saýalǵa Astana qalasy bilim basqarmasynyń basshysy Qasymhan Senǵazıev jaýap berdi, dep habarlaıdy QazAqparat tilshisi.

«Qujattardy qabyldaý 1 sáýir men 1 tamyz aralyǵynda júrdi. Degenmen biz túsinemiz, ártúrli sebeppen úlgermeı qalǵan ata-analar bar. Qujattar tapsyrýda keshikken ata-analarmen mektepter janynan komıssııa jumys istep jatyr. Qujattardy qaǵaz túrinde mektepke baryp tapsyrýǵa bolady», - dedi Qasymhan Senǵazıev Astana qalasy kommýnıkatsııalar qyzmeti alańynda ótken baspasóz máslıhatynda.

Onyń aıtýynsha, qujattar «elektrondyq úkimet» veb-portaly arqyly qabyldandy.

Eske sala keteıik, birinshi synypqa qujattardy qabyldaý 1 tamyzda aıaqtaldy.

Oqý-aǵartý mınıstrliginiń málimetinshe, bıyl birinshi synypqa qabyldaý boıynsha 400 myńnan astam ótinish tústi.

Bıyl mektepke baratyn balalardyń 70 paıyzy qazaq tilinde bilim alýdy tańdaǵan. Qalǵandary orys, uıǵyr jáne tájik tilderinde oqıdy.