Mektepke keletinderdi ótkizý tártibine qatysty tıisti ereje qabyldanbaq

ASTANA. QazAqparat – Balalar qaýipsizdigine qatysty bilim berý uıymdarynda birinshi basshylardyń derbes jaýapkershiligi kúsheıtilmek. Bul týraly Oqý-aǵartý vıtse-mınıstri Edil Ospan aıtty, dep habarlaıdy Qazaqparat tilshisi.

«Balalar qaýipsizdigin mektepte qamtamasyz etýdi odan ári jetildirý baǵytynda mınıstrlik birqatar bastamany kóterip otyr. Bilim berý uıymdary birinshi basshylarynyń derbes jaýapkershiligin kúsheıtý eskerilgen. Shuǵyl áreket etetin jaǵdaılar boıynsha mektep dırektoryn tıisti is-qımyl algorıtmine oqytý júrgiziledi», - dedi E. Ospan Májiliste mektepke deıingi jáne orta bilim berý uıymdaryndaǵy qaýipsizdik júıeleri taqyrybyna arnalǵan dóńgelek ústel otyrysynda.

Onyń aıtýynsha, ishki ister organdarynyń qatysýymen bilim berý uıymdarynyń qaýipsizdik júıelerine turaqty túrde monıtorıng júrgizý qarastyrylǵan.

«Mektepke keletinderdi ótkizý tártibine qatysty arnaıy tıptik ereje qabyldaý jáne tıisti nusqaýlyqqa ózgeris engizý eskerilgen», - dedi vıtse mınıstr.

Budan buryn habarlanǵandaı, 2020 jylmen salystyrǵanda jedel basqarý ortalyqtaryna qosylǵan bilim berý uıymdarynyń sany 11 esege (2020 j. – 500, 2023 j. – 5 588) artty.

Oqýshylary kóp jáne iri qalalarda ornalasqan bilim berý uıymdarynda lıtsenzııalanǵan kúzettiń qamtamasyz etilmeýi anyqtaldy.