Mektepke qandaı psıhologtar kerek - jastar pikiri

ASTANA. QazAqparat - Jastarǵa arnalǵan memlekettik áleýmettik tapsyrys granttaryn barlyq mınıstrlikter bólýi kerek. Bundaı pikirdi Parlament Senatynda Jastar jylyna arnalǵan dóńgelek ústelde «Qazaqstan jastarynyń kongresi» qaýymdastyq nysanyndaǵy ZTB atqarýshy dırektory Toqtar Bolysov málim etti, dep habarlaıdy QazAqparat.

«Memlekettik jastar saıasaty týraly zańnama barlyq memorgandardyń jastardy damytýǵa qoldaý jasaýyn eskergen. Alaıda is júzinde memlekettik áleýmettik tapsyrystardyń granttaryn kóbine Qoǵamdyq damý mınıstrligi ǵana bóledi. Beıindi baǵyttar boıynsha basqa da mınıstrlikter boıynsha granttar men memlekettik áleýmettik tapsyrystardy qarjylandyrýdy kúsheıtý kerek. Mysaly, Densaýlyq saqtaý mınıstrligi jastar arasynda salaýatty ómir saltyn qalyptastyrý salasynda, Mádenıet jáne sport mınıstrligi ulttyq batyrlardy nasıhattaý boıynsha rolıkter men materıaldardy jasaýdy qamtysa durys bolar edi», - dedi T. Bolysov.

Budan bólek ol balalarǵa psıhologııalyq kómek kórsetý máselesine toqtaldy.

«Búginde jastardyń kóptegen problemasy durys psıhologııalyq kómektiń bolmaýyna baılanysty týyndap otyr. Psıhologııalyq qoldaý ınstıtýty tıisti deńgeıde emes. Balalar men jastar ómirlik qıyn jaǵdaıda kimge bararyn bilmeıdi. Mektep psıhologtarynyń quzyret deńgeıi álsizdeý. Sondyqtan da psıhologtardyń mártebesi men olardy oqytý máselesin qaıta qarastyrý kerek», - ded Toqtar Bolysov.