Mektepke deıingi bilimmen qamtý on jylda 96 paıyzǵa jýyqtady — Asan Darbaev

ASTANA. KAZINFORM — Qazaqstandaǵy Ornyqty damý maqsattarynyń (ODM) monıtorıng júıesi 200 ındıkatordy qamtıdy. Bul týraly Ortalyq kommýnıkatsııalar qyzmetiniń alańynda QR Ulttyq ekonomıka vıtse-mınıstri Asan Darbaev málimdedi.

— Qazirgi tańda Qazaqstandaǵy ODM-nyń monıtorıng júıesi 200 ındıkatordy qamtıdy. Onyń ishinde 69-y Qazaqstan úshin ózekti dep tanylsa, 131 ındıkator monıtorıng júrgizýge arnalǵan, — dedi vıtse-mınıstr.

Sondaı-aq vıtse-mınıstrdiń aıtýynsha, sońǵy on jyl ishinde Ornyqty damý maqsattary aıasynda birqatar baǵyt boıynsha oń dınamıka qalyptasqanyn atap ótti.

— Máselen, mektepke deıingi bilimmen qamtý deńgeıi 2015 jyly 53,8 paıyz bolsa, 2024 jyly bul kórsetkish 95,9 paıyzǵa jetti. Bul «sapaly bilim» jónindegi 4-Ornyqty damý maqsaty aıasyndaǵy mańyzdy nátıje, — dedi vıtse-mınıstr.

Ol óz sózinde, Ornyqty damý maqsattaryna qol jetkizý strategııalyq jáne bıýdjettik josparlaýdyń ózara tyǵyz baılanysyn talap etedi dep atap ótti.

— Strategııalyq qujattarǵa engizilgen Ornyqty damý maqsattarynyń ulttyq ındıkatorlary bıýdjettik baǵdarlamalarmen tikeleı baılanysty. Bul olardyń praktıkalyq iske asyrylýy úshin qajetti qarjylandyrý kózdelgenin bildiredi, — dep túıindedi ol.

Buǵan deıin tsıfrlandyrý álemdegi ornyqty damý ındıkatorlarynyń 70 paıyzyna yqpal etetinin jazǵanbyz.

Eske sala keteıik, 2015 jyly BUU 2030 jylǵa deıingi Ornyqty damý maqsattaryn (ODM) qabyldady. Osylaısha álem elderi aldaǵy 15 jyldyń ishinde shuǵyl túrde jahandyq problemalardy sheshýge kirisip ketti. Qazaqstan bul bastamadan qalys qalǵan joq, óziniń ulttyq maqsattary men mindetterin aıqyndady. Al ony oryndaýda jasandy ıntellekti men tsıfrlyq tehnologııa qandaı ról atqarady? Kazinform tilshisi memlekettik organdardyń atqaryp jatqan jáne josparlanǵan jumystaryn negizge ala otyryp taqyrypqa sholý usynady.