Mektepke deıingi bilim berýdi vaýcherlik qarjylandyrýdy engizý Tarazda bıýdjet qarajatyn únemdedi
TARAZ. KAZINFORM - Taraz qalasynda mektepke deıingi bilim berýdi vaýcherlik qarjylandyrý júıesiniń pılottyq jobasy aıaqtaldy. Joba nátıjelerin Premer-Mınıstrdiń orynbasary Tamara Dúısenovanyń tóraǵalyǵymen ótken keńeste QR oqý-aǵartý mınıstri Ǵanı Beısembaev baıandady.
Pılottyq joba sheńberinde Taraz qalasyndaǵy 160 mekeme, onyń ishinde shaǵyn-ortalyqtar men jekemenshik balabaqshalar vaýcherlik qarjylandyrý júıesimen qamtyldy.
Mınıstrdiń málimetinshe, pılottyq joba arqasynda 2024 jyldyń shilde aıynda 2 jastan asqan 11 983 balany quraǵan qaladaǵy balabaqsha kezegi qyrkúıekte 17 balaǵa deıin qysqarǵan.
Sonymen qatar vaýcherlik qarjylandyrý júıesi bıýdjet qarajatyn aıtarlyqtaı únemdeýge múmkindik berdi. Eki aı ishinde mektepke deıingi bilim berý salasyna jumsalǵan shyǵyndar shildedegi 1,7 mlrd teńgeden qyrkúıekte 1,1 mlrd teńgege deıin tómendep, nátıjesinde shamamen 600 mln teńge únemdeldi.
Bul úrdis vaýcherlik qarjylandyrý tetiginiń tıimdiligimen tikeleı baılanysty.
Birinshiden, júıe talaptarǵa saı keletin barlyq mektepke deıingi uıymdarǵa bıýdjet qarajatyna qol jetkizýge múmkindik beredi.
Ekinshiden, ata-analarǵa balabaqshany óz qalaýy boıynsha tańdaý quqyǵy beriledi.
Úshinshiden, «aqsha qyzmet alýshy sońynan» qaǵıdasy negizinde qarjylandyrý protsesi ashyq júrgiziledi, ıaǵnı qarajat mekemege ata-analar balanyń sabaqqa qatysýy týraly derekterdi rastaǵannan keıin ǵana aýdarylady.
Mınıstrdiń aıtýynsha, tekseris nátıjesinde zańbuzýshylyqtar anyqtalǵan. Máselen, júıede tirkelgen myńnan astam búldirshinniń Taraz qalasynda turaqty tirkeýi bolmaǵan, 99 bala basqa óńirlerdegi balabaqshalar esebinde turǵan. Sondaı-aq jalǵan tirkeý boıynsha birneshe jaǵdaı anyqtaldy.
«Anyqtalǵan zańbuzýshylyq faktileri boıynsha barlyq materıal quqyq qorǵaý organdaryna tapsyrylyp, tıisti sharalar qabyldanady», — dep málimdedi mınıstr.
Tarazdaǵy oń tájirıbe jobanyń elimizdegi basqa óńirlerge keńinen taralýyna jol ashyp otyr. Qazirgi tańda vaýcherlik qarjylandyrý júıesi Shymkent pen Túrkistan qalalarynda synaqtan ótkizile bastady. Tamara Dúısenova tıisti mınıstrlik pen oblys ákimderi orynbasarlaryna kelesi jyldan bastap vaýcherlik qarjylandyrý júıesin engizýge daıyndyq jumystaryn bastaýdy tapsyrdy.
«Bul – balalar men olardyń ata-analary qajettilikterine jaýap beretin, mektepke deıingi bilim berýdi qarjylandyrýdyń tıimdi modeli», — dep atap ótti vıtse-premer.
