Mektepke deıingi bilim: vaýcherlik qarjylandyrý júıesi osy jyldyń sońyna deıin tolyq engiziledi

ASTANA. KAZINFORM — 2024 jyldan bastap mektepke deıingi uıymdarda vaýcherlik qarjylandyrýdyń pılottyq jobasy iske qosyldy. Búgingi kúni bul joba oblystyq mańyzy bar 15 qalada jáne elimizdiń eki óńirindegi 5 aýdanda júzege asyrylyp otyr. Bul týraly Oqý-aǵartý mınıstrligi  málim etti.

Olar Taraz, Shymkent, Túrkistan, Oral, Astana, Semeı, Óskemen, Qostanaı, Qaraǵandy, Petropavl, Pavlodar, Jezqazǵan, Taldyqorǵan, Qosshy, Qonaev qalalary men Jambyl oblysynyń Baızaq, sondaı-aq Túrkistan oblysynyń Saryaǵash, Saıram, Maqtaaral, Qazyǵurt, Jetisaı aýdandary.

– Vaýcherlik qarjylandyrý júıesine 3 myńnan astam mektepke deıingi uıym qosyldy. Osy ýaqyt ishinde 230 myńnan astam bala mektepke deıingi bilimmen qamtyldy. Taraz, Túrkistan, Shymkent, Oral, Astana qalalarynda vaýcher júıesi engizilgeli beri kezek 44%-ǵa qysqardy, – deıdi mektepke deıingi bilim berý departamentiniń dırektory Manar Adamova.

Maýsym-shilde aılarynda bul jobaǵa Aqtaý, Aqtóbe, Atyraý, Qyzylorda, Almaty qalalary qosylady. Al 2025 jyldyń sońyna deıin elimizdegi barlyq mektepke deıingi uıymdar osy júıege engiziledi.

Aıta keteıik, vaýcherlik qarjylandyrý júıesi belgilengen talaptarǵa saı keletin jáne bos oryndary bar mektepke deıingi uıymdarǵa qoljetimdilikti qamtamasyz etedi.

Ata-analarǵa balabaqshany óz qalaýy boıynsha tańdaý múmkindigi berilgen, bul jekemenshik qana emes, memlekettik balabaqshalar arasynda da salaýatty básekelestikti qalyptastyrady.

Júıe eń aldymen qarjylandyrý protsesiniń ashyqtyǵyn qamtamasyz etetin basty shartty qamtıdy – «aqsha balaǵa beriledi». Qarajat ata-analar balanyń qatysý tabelindegi derekterdi rastaǵannan keıin ǵana aýdarylady.