Mektepke deıingi uıymdardyń 64,3 paıyzy qazaq tilinde jumys isteıdi - A. Sárinjipov
ASTANA. QazAqparat - Ózge tilderdegi mektepterde qazaq tilin oqytýǵa bólinetin aptalyq oqý júktemesi árbir synypta 1 saǵatqa kóbeıtildi.
Bul týraly búgin «Nur Otan» partııasy janyndaǵy «Mıras» qoǵamdyq keńesiniń memlekettik tildi oqytý, qazaq tilindegi oqýlyqtar máselesi taqyrybyndaǵy keńeıtilgen otyrysynda QR Bilim jáne ǵylym mınıstri Aslan Sárinjipov málim etti.
Memlekettik tildi damytý men oqytýdaǵy negizgi baǵyttaryna toqtalǵan vedomstvo basshysy, «Orys, ózbek, uıǵyr, tájik tilderindegi mektepterde qazaq tilin oqytýǵa bólinetin aptalyq oqý júktemesi árbir synypta 1 saǵatqa kóbeıtildi. Qazirgi kezde mektepke deıingi uıymdardyń 64,3 paıyzy qazaq tilinde jumys isteıdi»,-dedi.
Taratylǵan málimetterge qaraǵanda, Táýelsizdik alǵan jyldar ishinde qazaq mektepteriniń sany 1051 mektepke artyp,tehnıkalyq jáne kásiptik bilim berý salasynda memlekettik tilde bilim beretin 93 uıym qatarǵa qosyldy. Mektep oqýshylarynyń 65%-dan artyq bóligi qazaq tilinde oqıdy. Tehnıkalyq jáne kásiptik bilim berý uıymdarynda qazaq tilinde oqıtyndar úlesi 1991 jyldan beri 23,1 paıyzdan 51,6 paıyzǵa jetti. Al joǵary oqý oryndarynda mamandardy qazaq tilinde daıarlaý 58,6 paıyzǵa deıin ósti.
