Mektepke deıingi uıymdarda balalardy kezekshi toptarǵa qabyldaý uıymdastyrylady
NUR-SULTAN. QazAqparat – Mektepke deıingi uıymdarda balalardy kezekshi toptarǵa qabyldaý uıymdastyrylady. Bul týraly Bilim jáne ǵylym mınıstri Ashat Aımaǵambetov málim etti, dep habarlaıdy QazAqparat tilshisi.
«Mektepke deıingi uıymdarda ata-analardyń qalaýy boıynsha balalardy kezekshi toptarǵa qabyldaý uıymdastyrylady. Sáıkesinshe, bul toptardaǵy balalardyń sany on besten aspaýy tıis», - dedi mınıstr Úkimet otyrysynda.
Budan bólek ol qosymsha bilim berý uıymdarynda oqytý sharalaryna toqtaldy. Balalar ata-analardyń ótinishi negizinde qashyqtan nemese jeke tártippen oqýǵa, sonymen qatar bes baladan aspaıtyn shaǵyn toptardaǵy úıirmelerge qatysatyn bolady.
«Arnaıy bilim berý uıymdarynyń jumysy biz úshin erekshe mańyzǵa ıe. Osy erekshe búldirshinder qazirgi jaǵdaıda úlken nazardy qajet etedi. Sondyqtan ata-analarynyń tańdaýy boıynsha arnaıy onlaın keńes berý nemese mamandardyń jeke qabyldaýlary uıymdastyrylady. Densaýlyǵynda kúrdeli problemalary bar balalardy qabyldaý aldyn ala jazylý tártibimen jeke júrgiziledi», - dedi A. Aımaǵambetov.
Budan buryn habarlanǵandaı, mınıstr bastaýysh synyp oqýshylary úshin kezekshi synyptar ashylatynyn aıtty.
