Mektepke deıingi tárbıemen qamtý 71,5 paıyzdy quraıdy - QR BǴM
ASTANA. 21 mamyr. QazAqparat - Byltyrǵy jyldyń kórsetkishi boıynsha mektepke deıingi tárbıemen qamtý 71,5 paıyzdy qurap otyr.
Búgin Parlament Májilisi Áleýmettik-mádenı damý komıtetiniń keńeıtilgen otyrysy barysynda QR Bilim jáne ǵylym mınıstrliginiń Jaýapty hatshysy Álııa Ǵalymova osylaı málimdedi. Eske salsaq, komıtet otyrysynda 2012 jylǵa arnalǵan respýblıkalyq bıýdjettiń atqarylýy talqylanǵan bolatyn.
Jaýapty hatshynyń aıtýynsha, mınıstrlik byltyrǵy qarajatty 99,8 paıyzǵa ıgergen. Sonyń arqasynda, ótken jyly 2011 jylmen salystyrǵanda mektepke deıingi uıymdar jelisi 999 birlikke artqan. «Kezekke turyp tirkelgen balalardyń jalpy sanynan 3-6 jas aralyǵyndaǵy balalardy mektepke deıingi bilim jáne tárbıemen qamtý 71,5 paıyzdy qurady. Úsh aýysymdaǵy jáne apatty jaǵdaıdaǵy oqýshy oryndarynyń tapshylyǵy problemalary kezeń-kezeńimen sheshilýde. Máselen, 2012 jyly respýblıkalyq bıýdjetten bólingen nysanaly transfertter esebinen salynǵan 48,5 myń oqýshy orny bar 56 mektep paıdalanýǵa berildi. Sonyń ishinde úsh aýysymdy bilim berýdi joıý úshin 14 mektep, apatty jaǵdaıdaǵy mektepti aýystyrý úshin 23 mektep, oqýshy oryndarynyń tapshylyǵy problemasyn sheshý úshin 19 mektep salyndy», - deıdi Á. Ǵalymova.
