Mektepke deıingi tárbıeleý mekemelerin qazynalyq kásiporyn sanatynan memlekettik mekeme sanatyna aýystyrý qajet - S. Eńsegenov
ASTANA. Qańtardyń 28-i. QazAqparat /Qanat Mámetqazyuly/ - Mektepke deıingi tárbıeleý mekemelerin qazynalyq kásiporyn sanatynan memlekettik mekeme sanatyna aýystyrý múmkindigin qarastyrý qajet. Búgin QR Parlamenti Senatynyń jalpy otyrysynda Úkimet basshysy Kárim Másimovtyń atyna saýal joldaǵan senator Sársenbaı Eńsegenov osylaı málim etti,
dep habarlaıdy QazAqparat.
«Búgingi kúni elimizde memlekettik mektepke deıingi mekemelerdiń qyzmetkerlerine ýaqytsha jumysqa jaramsyzdyǵyna baılanysty beriletin áleýmettik járdemaqyny tóleý tolyq sheshimin tappaı otyr. Salyq kodeksine sáıkes memlekettik mekemelerdiń esepti aıǵa eseptegen áleýmettik salyq somasy eńbekke ýaqytsha qabiletsizdigi boıynsha tólengen áleýmettik járdemaqy somasyna azaıtylady. Al mektepke deıingi tárbıeleý mekemeleri memlekettik kommýnaldyq qazynalyq kásiporyn nysanynda qurylǵan. Osyǵan baılanysty, balabaqshalarda Salyq kodeksiniń 361-babynda memlekettik mekemeler úshin kózdelgen jeńildikter qoldanylmaı keledi. Bunyń ózi balabaqsha qyzmetkerlerine jumysqa jaramsyzdyǵyna baılanysty tıisti áleýmettik járdemaqyny tóleýde qıyndyq týǵyzady», deıdi senator. Onyń aıtýyna qaraǵanda, balabaqshalar qazynalyq kásiporyn bolyp tabylǵanymen, olardyń qosymsha tabys tabý múmkindikteri shekteýli. Al ata-analardan jınalatyn qarjynyń basym bóligi tamaq pen qajetti quraldardy alýǵa jumsalady.
«Qarjynyń jetispeýshiliginen bala baqsha basshylary qoldanystaǵy salyq zańnamasyn buza otyryp, jumysqa jaramsyzdyǵyna baılanysty tólengen qarjyny áleýmettik salyq somasynan shegerýge deıin baryp jatyr. Al Salyq organdary bundaı zańsyzdyqqa oraı balabaqshalarǵa aıyppul salyp, olardyń esep shottaryn shekteıdi. Al ondaı mekemelerde qosymsha qarjy bolmaǵandyqtan, jergilikti bıýdjetten qarjy bólinip, aıyppul tólengenshe qyzmetkerler birneshe aı eńbekaqylaryn ala almaı qıyndyqqa urynady. Bul jerde memleketke kelip otyrǵan esh paıda joq. Tipti, memleket esebine túsip, onyń kirisin molaıtýǵa tıisti aıyppuldy memleket óziniń qarjysynan tólep otyr», dedi S. Eńsegenov.
Osyǵan oraı, depýtat memlekettik mektepke deıingi tárbıeleý mekemelerin, onyń ishinde eń bolmaǵanda aýyldyq jerlerdegi mekemelerdi qazynalyq kásiporyn sanatynan memlekettik mekeme sanatyna aýystyrý múmkindigin qarastyrý qajettigin alǵa tartty.
