Mektepke deıingi mekemelerde qadaǵalaý joq - Bilim salasyndaǵy baqylaý departamentiniń dırektory
ASTANA. 17 qyrkúıek. QazAqparat - Mektepke deıingi mekemelerde qadaǵalaý joq. Bul týraly búgin Astanada ótken dóńgelek ústel barysynda QR BǴM Ǵylym salasyndaǵy baqylaý komıteti Astana qalasynda Bilim salasyndaǵy baqylaý departamentiniń dırektory Qaırat Ábdibekov málim etti.
«Astananyń mektepke deıin bilim berý uıymdaryna monıtorıng júrgizý jáne mektepke deıin bilim boıynsha qaladaǵy ahýaldy taldaý barysynda, sondaı-aq azamattar tarapynan kelip jatqan ótinishter aıasynda kelesi problemalar anyqtalyp otyr. Birinshiden, bul bilim berýdiń mektepke deıingi uıymdary lıtsenzııalanbaýyna baılanysty, jańadan ashylǵan mekemelerdiń esebi júrgizilmeıdi. Osynyń saldarynan mektepke deıingi mekemelerdiń sany belgisiz jáne atalǵan mekemelerdegi balalar mektepke deıingi bilim berýdi qamtýdyń statıstıkalyq málimetterine enbeı qalady», - deıdi ol.
Onyń sózine qaraǵanda, buryndary zańnama aıasynda jergilikti atqarý organdaryna bilim berý uıymdarynyń esebin júrgizýdi mindettegen edi, onyń ishinde lıtsenzııalaýdy talap etpeıtinderdi de. Alaıda, «Bilim týraly» Zańnyń jańa redaktsııasynda bul norma eskerilmedi. Sondyqtan da qazirgi kezde mektepke deıingi mekemelerdiń jelisin eshkim qadaǵalamaıdy, buǵan qosa olardyń esebi de júrgizilmeıdi.
Departament basshysynyń aıtýynsha, jekemenshik mektepke deıingi mekemelerdi jeke kásipkermen qatar jaýapkershiligi shekteýli seriktestik turǵysynda da ashýǵa bolady. Osy oraıda olardyń qyzmetiniń túri men mekemeniń meken-jaıy kórsetilmeıdi. Osyndaı kóptegen mekemelerde sanıtarlyq erejelerdiń buzylýy, órt qaýipsizdigi talaptarynyń oryndalmaýy anyqtalýda jáne bilikti mamandarmen qamtylmaǵan.
