Mektepke deıingi mekemelerde búldirshinderdi shet tiline emes, ana tiline oqytý qajet - A. Smaıyl

ASTANA. 14 qarasha. QazAqparat - Qazaqstanda mektepke deıingi mekemelerde búldirshinder shet tiline emes, ana tiline oqytylý qajet. Búgin Parlament Májilisi Áleýmettik-mádenı damý komıtetiniń keńeıtilgen otyrysynda depýtat Aldan Smaıyl osylaı málim etti. Eske salsaq, depýtat Darıǵa Nazarbaeva jetekshilik etken komıtet otyrysynda Qazaqstandaǵy mektepke deıingi bilim berýdi damytý máseleleri talqylanǵan bolatyn.

«Men balabaqshalarda aǵylshyn tilin úıretý saǵattaryn arttyrý sekildi máselemen esh kelispeımin. Sebebi shet tilin bala erteńgi kúni mektepte de oqıdy. Sol da jetedi. Al balanyń mıy jańa tilderdi tanýǵa qabiletti degen buǵan syltaý bolyp sanalmaıdy. Sondyqtan da, eń birinshi kezekte, balabaqshadaǵy búldirshin ana tilin meńgerip alsyn», - dedi Aldan Smaıyl. Bul rette depýtat 5 synypqa deıin ana tilinen basqa tilderdi múldem oqymaıtyn Japon eliniń tájirıbesin de alǵa tartty. «Rasynda, damyǵan elderdiń ozyq tájirıbesi bar. Mysaly, Japonııada balalardy 5 synypqa deıin shet tilderine oqytpaıdy. Jaqsy, biz oqytyp jatyrmyz delik, onda eń aldymen balalardy ana tiline jetik etip oqytyp, úıretý kerek»,- dedi A.Smaıyl.