Mektepke deıingi bilim berýdiń jańa modeli ázirlenedi – mınıstr
NUR-SULTAN. QazAqparat – Mektepke deıingi bilim berýdiń jańa modeli ázirlenedi. Bul týraly búgin Úkimet otyrysynda QR Bilim jáne ǵylym mınıstri Ashat Aımaǵambetov aıtty, dep habarlaıdy QazAqparat tilshisi.
«3 pen 6 jas aralyǵyndaǵy balalardy qamtý kórsetkishi 98,8 paıyzǵa deıin jetti. Desek te, 2-den 6 jasqa deıingi balalardy qamtý deńgeıi áli de 71 paıyzdy ǵana quraıdy. Sondyqtan biz endi erte jastaǵy, ıaǵnı 2 men 6 jastaǵy balalardy qamtý mindetin basty nazarǵa qoıyp otyrmyz. Osy jastaǵy balalar úshin eń kóp kezek búginde Almaty, Túrkistan, Mańǵystaý oblystary men Almaty, Shymkent qalalarynda. Maqsat – 2025 jylǵa qaraı 2-6 jastaǵy balalardy qamtýdy 95 paıyzǵa, al 3-6 jastaǵy balalardy qamtýdy 100 paıyzǵa jetkizý», - dedi mınıstr.
Ashat Aımaǵambetovtiń atap ótýinshe, ol úshin jeke menshik balabaqshalar jelisin odan ári damytý, vaýcherlik qarjylandyrýdy, sonymen qatar áleýmettik tárbıeshi ınstıtýtyn engizý tetikterin keńinen qoldanylady.
«Sáıkesinshe ákimdikterden memlekettik tapsyrys mólsherin normatıvke saı tóleý máselesin sheshýlerin suraımyn. Óıtkeni olsyz jańa oryndar ashý múmkin bolmaıdy. Memleket basshysynyń tapsyrmasyna sáıkes mektepke deıingi bilim berýdiń jańa modeli ázirlenedi. Ony engizý jańa oqý jylynan bastalady. Bul úshin «Oıyn arqyly oqytý» qaǵıdaty negizinde memlekettik standartqa ózgerister engiziledi. Tárbıeshilerdi daıarlaý, biliktiligin arttyrý júıesi jáne baǵdarlamalar jańarady. Sonymen birge engiziletin Vaýcherlik qarjylandyrý tetigi de balabaqshalardyń básekelestigin arttyrý arqyly bilim sapasyna da oń ózgeris ákeletini anyq», - dedi ol.
