Mektepke bireý qarý alyp kirse, polıtsııa ony qalaı biledi
AQTÓBE. KAZINFORM — Qaladaǵy saıajaı aýmaqtaryna kamera kerek, al turǵyn úı aýlalaryndaǵy beınebaqylaý kamerasy taıaýda ortalyqqa qosylady. Qazir mektepterdegi kameralar úlken sýyq qarýdy birden anyqtap, jedel basqarý ortalyǵyna sıgnal beredi. Kazinform tilshisi Prezıdent úlgi etken ortalyqtyń jarty jyldyq jumysyn kórip keldi.
Aqtóbe qalalyq polıtsııa basqarmasynyń jedel basqarý ortalyǵy polıtsııa bóliminiń aýlasynda ornalasqan. Munda tek osy ortalyqta jumys isteıtin qyzmetkerler bet-álpetin skanerden ótkizip kire alady.
Ortalyqta 102 qyzmeti bólek, al qaladaǵy 9 myń kamerany baqylaıtyn mamandar ortaq zalda bólek otyrady. Alyp kamera elimiz boıynsha izdeýde júrgen adamdardyń fotosyna, qalanyń negizgi jáne qosalqy joldaryna qoıylǵan kamera beınejazbalaryna toly.
Munda qala tirligin kórip, zańbuzýshylyq bolsa jedel jasaqqa habar berýge, qylmystyń aldyn alýǵa jaǵdaı jasalǵan.
— Aqtóbe qalasy tórtke bólingen. Almaty, Astana aýdandary jáne № 1 jáne № 2 qalalyq polıtsııa bólimi. Túsken habarlamalardy ortalyq operatory tirkep, aýmaqqa jaýapty kezekshi bólimge habarlama jiberedi. Qylmystyq is bolsa jasaq 7 mınýtta jetip úlgeredi. Patrýldeý kezinde júrgen eń jaqyn top shuǵyl barady. Qylmys bolsa jedel-tergeý toby shyǵady. Olar qarap, hattama toltyrady. Sotqa deıingi tergep-tekserýdiń biryńǵaı tizilimine tirkeıdi. Kúnine 700-800 habarlama tússe, onyń 300-den astamyna jasaq barady, — dedi Aqtóbe qalalyq polıtsııa basqarmasynyń Jedel basqarý ortalyǵynyń bastyǵy Ersaıyn Ábilǵazıev.
Ortalyqtaǵy ár beınebaqylaý ınspektorlarynyń óz mindeti bar. Alǵashqy qatardaǵy kamera men kompıýter arqyly qaladaǵy qylmys, onyń ishinde velosıped, kólik urlyǵy anyqtalady.
ıAǵnı ınspektorlar sıgnal túskenin kútip otyrmaı beınebaqylaý jazbasyn qarap, quqyqbuzýshylyq bolsa sol mekenjaıdy beıneaıǵaqpen birge jaýapty bólimge tapsyrady.
Ári qaraı izdep tabý, zań aıasynda jaýapqa tartý mindeti tur.
— Buryn bizde 208 kamera bolsa, qazir 9 myń kamera bar. Munda mektep, kolledjdiń de kameralary qosylǵan. Onyń 100-den astamy ıntellektýaldy kamera. Bul degenimiz eger elimizde izdeý jarııalanǵan kúdiktiler saýda úılerine kiretin bolsa sıngal túsedi. Jedel jasaq jiberip, anyqtaý jumysyn júrgizedi. Alıment tólemeı júr me, izdeý jarııalanǵan adam ba álde qylmysker me? Anyqtaǵan soń sol aýmaqta ornalasqan polıtsııa bólimine jetkiziledi. Al jol erejesiniń saqtalýyn 200-ge jýyq kameramen qaraımyz. Ásirese qıylystarǵa 100 beınebaqylaý kamerasy qoıylǵan. Onyń 66-da saraptama júrgiziledi. ıAǵnı kólikterdiń nómirin birden anyqtaıdy. Sonymen birge sol jolda bir saǵatta qansha kólik júrgenin sanap beredi. Sonymen birge Qarǵaly, Temir, Qandyaǵash, Hromtaý, Shalqar, Mártóktegi kameralar da ortalyqqa qosylǵan. Biraq olardaǵy zańsyzdyqty aýdandaǵy ortalyqtardyń ózderi anyqtap, shara qoldanady. Qala shetindegi kameralardy da qaraýǵa bolady. Bul kameralardy kólik urlaý faktisi tirkelgende qaraımyz. Tek kóliktiń nómiri men markasyn dál anyqtap alsa jetkilikti. Júıege salǵan kezde qaı ýaqytta qaı kóshe arqyly júrgeni anyq kórinedi, — dedi jedel basqarý ortalyǵynyń bastyǵy.
Bir ınspektor 45 kamerany qaraýy tıis
Aqtóbede «KASKAD», «Rýbej» beınebaqylaý kameralary da qondyrylǵan. Joldaǵy qaýipsizdikti baqylaýǵa múmkindik beretin bul júıe avtomattandyrylǵan.
Sonymen birge sońǵy kezde qondyrylǵan kameralardyń múmkindigi joǵary. Adamdardyń bet-álpetin anyq kórsetedi. Tipti 500 metrge deıin jaqyndatyp qaraýǵa bolady.
— «Qazaqtelekom» AQ qyzmet kórsetetin kameralar da ortalyqqa qosylǵan. Aldaǵy ýaqytta ózge de qyzmet kórsetý kompanııalarynyń júıesin ortalyqqa qosý josparlanyp otyr. Qazir qalada 57 myń kamera bar eken. Aldaǵy ýaqytta jartysyn ıntegratsııalaıdy. Aqtóbe oblystyq tsıfrlandyrý basqarmasy osy baǵytta jumys istep jatyr. Onyń kóp kómegi bar. Páter urlyǵy, velosıped urlyǵyn tez ashýǵa bolady. Podezge kirgen adamdardyń kim ekenin anyqtaý úshin qazir suranys jazyp, keıin ǵana qaraýǵa ruqsat alyp júrmiz. Al ortalyqqa qosylǵanda bir-aq mınýt jetkilikti bolady, — dedi Ersaıyn Ábilǵazıev.
Jedel basqarý ortalyǵyndaǵy jumys erejesine saı bir ınspektor 45 kamerany qaraýy tıis.
Ázirge Aqtóbedegi ortalyq 2006 jylǵy júktememen jumys istep tur. Munda bar bolǵany 15 operator bolsa, olar bir táýlik jumys istep, eki táýlik tynyǵady.
Jumys ýaqytynda kúndizgi aýysymda jumys isteıtin polıtsııa qyzmetkerleri men oblys ákimdigi janyndaǵy Ahýaldyq ortalyq mamandary jumyldyrylady.
— Aldaǵy ýaqytta saraptama jasaıtyn kameralar kóbeıedi. Bul izdeý jumystaryn júrgizýge, qandaı da bir zatty, sonyń ishinde qoqysty laqtyryp ketken adamdy anyqtaýǵa múmkindik beredi. Sonymen birge qazir mektepke qarýmen kirse de birden sıgnal túsedi. Ortalyqqa 141 mektep kamerasy qosýly. Qala ǵana emes, aýdan, aýyldarda da bar. Birde alǵashqy áskerı daıyndyq sabaǵyna arnalǵan mýlıajǵa da sıgnal oınady, — dedi ortalyq bastyǵy.
Aqtóbe qalasy boıynsha qazir baý-baqsha ujymdarynyń aýmaǵyn baqylaý qıyn bolyp tur.
Sonymen birge oıyn-saýyq ortalyqtary, túngi klýbtar men meıramhanalar jeke kameralaryn ıntegratsııalaýǵa áli kelispedi. Sebebi kásipkerler ony qondyrý, qyzmet kórsetý shyǵynyn óz esebinen tólep otyr.
— Jıi qylmys tirkeletin dámhana, túngi klýbtar mańynda ortalyq kamerasy bar. Bul belgili bir deńgeıde baqylaý jasaýǵa múmkindik beredi, — dedi ol.
Qaladaǵy kameralarǵa baqylaý ortalyqqa júktelgenimen, olardy súrtý, tazartý ózge qyzmet kórsetý mekemeleriniń mindeti. Ortalyq jaýaptylarǵa suranys berip, qajet kezde tehnıkalyq qyzmet kórsetýdi tapsyrady.
Sonymen birge shetelden ákelgen kólik tirkelmese de joldaǵy buzýshylyq kameralaryna tirkeledi. Patrýldik polıtsııa toqtatyp, qujat teksergen kezde kólik ıesine birden aıyppul salynady. Keıde bir júrgizýshige ondaǵan hattama da toltyrylady.
Sonymen birge qazir qaladaǵy birneshe mektep janyndaǵy júrginshiler jolyna kamera qoıyldy. Eger kólik júrgizýshisi joldy kesip ótpek bolǵan adamǵa jol bermese, birden kólik nómiri anyqtalyp, ıesine hattama toltyrylady. Munda beınebaqylaý kamerasy ázirge sanaýly ǵana.
«102» qosymshasynyń qyzmeti
Sonymen birge kez kelgen turǵyn «102» qosymshasyn júktep alsa bolady. Shaǵymdy elektrondy túrde jiberip, jaýap ala alady.
Munda kórshisi tún ishinde tazalaǵandar, kóshede múgedektigi bar adamdardyń kóligine arnalǵan turaqty zańsyz paıdalanǵandar týraly aqparatty turǵyndardyń ózi jiberip otyr.
Keńes suraıtyndar da bar. Jyl basynan beri 1400-den astam shaǵym men ótinish tústi. Munda da birneshe polıtsııa qyzmetkeri kezekshilikke shyǵady.
— Úıde otyryp, kóshede júrip shaǵym beredi. Qazir alaıaqtyq týraly da derek kóp. Mindetti túrde jaýap beredi. Arnaıy qosymshamen qatar ekinshi deńgeıli bank qosymshasynda da ótinish qabyldanady, — dedi Aqtóbe qalalyq polıtsııa basqarmasynyń Jedel basqarý ortalyǵynyń bastyǵy Ersaıyn Ábilǵazıev.
Eske salsaq, Prezıdent Aqtóbe sapary kezinde ortalyq qyzmetiniń jumysymen tanysty. Keıin barlyq óńirge osy ortalyq jumysyn engizýdi tapsyrǵan edi.
