Mektepke bara jatqan: Pákistanda arqanjolda qalyp qoıǵan adamdar qutqaryldy

ISLAMABAD. QazAqparat – Pákistannyń soltústik-batysyndaǵy shatqalda 274 metr bıiktiktegi arqanjolda qalyp qoıǵan 8 adamnyń barlyǵy qutqaryldy, dep habarlaıdy QazAqparat VVS-ge silteme jasap.

Buǵan deıin jazǵanymyzdaı, 8 adam, onyń ishinde 6 bala men 2 eresek mektepke bet alǵan. Haıber-Pahtýnhva provıntsııasynyń shalǵaıdaǵy jáne taýly aýdandarynda turatyn kóp bala mektepke arqanjolmen barady. Trostardyń biri úzilip ketip, adamdar 274 metr bıiktikte qalyp qoıǵan.

Jergilikti BAQ-tyń málimetinshe, qutqarýshylar jetkenshe jolaýshylar fýnıkýlerda kem degende tórt saǵat otyrǵan.

Arqanjoldaǵy aqaý seısenbi kúni, jergilikti ýaqytpen tańǵy saǵat 07.00 shamasynda Haıber-Pahtýnhva provıntsııasynyń Allaı alqabynda boldy.

Allaı – teńiz deńgeıinen 2 myń metr bıiktiktegi taýly aýdan. Munda eldi mekender bir-birinen alshaq ornalasqan. Pákistannyń soltústigindegi atalǵan taýly aýmaqta kólik ınfraqurylymy joq, joldar joqtyn qasy. Kóptegen aýdandar bir taýdan ekinshisine jetý úshin arqanjol syndy tasymaldaǵyshtardy paıdalanady.

Jergilikti muǵalim Pákistannyń Dawn basylymyna málim etkendeı, osyndaı tásilmen kúndelikti mektepke 150 bala qatynaıdy. Sebebi aýdanda basqa kólik joq.

Arqanjolda qalyp qoıǵan oqýshylar turatyn alqaptan mektepke deıingi araqashyqtyq jaıaý eki saǵatty quraıdy. Sondyqtan jergilikti turǵyndardyń biri – mehanık arqanjol tartýdy sheshken. Onymen taýǵa tórt mınýtta jetýge bolady. Polıtsııa málimetinshe, mehanık bul qurylysqa óńir bıliginen ruqsat alǵan. 22 tamyz kúni tańerteń arqanjol mektepke deıin tórt reıs jasaǵan. Besinshisinde trostary úzilip ketken.