Mektep jóndep jatqan merdiger bankrotqa ushyrady - Qostanaı oblysy
QOSTANAI. QazAqparat - Qostanaı oblysynda bilim mekemelerine 7 mln teńgeden astam qarajat bólindi, dep habarlaıdy QazAqparat.
Bıyl oblysta jańa oqý jylyna deıin 7 bilim mekemesi kúrdeli jóndeýden ótýi tıis. Amankeldi aýdanyndaǵy Á.Boranbaev mektebindegi kúrdeli jóndeý osy aptada aıaqtalady. Qostanaı aýdanyndaǵy orta mektep pen Arqalyq qalasyndaǵy B.Maılın atyndaǵy mektep 25 tamyzǵa deıin tapsyrylady. Oblystyq bilim berý basqarmasynyń basshysy Bátıma Daýmovanyń aıtýynsha, bıyl kúrdeli jóndeý jumystaryna bólingen qarjynyń jalpy somasy - 727,8 mln teńge.
«Qostanaı polıtehnıkalyq joǵarǵy kolledjindegi jóndeý jumystary biraz eńserilip qaldy. Búginde oqý mekemesiniń sheberhanalaryn, sport zaly men májilishanasyn jańartylyp jatyr. Kolledjdegi jóndeý jumystary 10 jeltoqsanda tolyq aıaqtalady», - dedi basqarma basshysy keńeıtilgen aktıv otyrysynda.
Kúrdeli jóndeý júrgizilip jatqan bilim nysandarynyń altaýy belgilengen merzimde tapsyrylady. Degenmen, Qarabalyq aýdanynyń Boskól orta mektebinde jumys turalap tur. Mektepti jóndeýge «Jumyspen qamtý kartasy-2020» baǵdarlamasy boıynsha 344 mln 800 myń teńge bólingen. 2018 jylǵa deıin 53 mln teńge qarajat ıgerilgenimen, merdiger bankrotqa ushyrap, jumys toqtap qalǵan.
«2 tamyzda jańa merdigermen kelisimshartqa otyrdyq. Kúrdeli jóndeý 10-qyrkúıekte aıaqtalady. Alaıda bul oqý protsesine kedergi keltirmeıdi. Sabaq óz ýaqytynda bastalady. 1-4 synyp oqýshylary men mektepke deıingi daıyndyq toby Boskól bastaýysh mektebinde tústen keıin oqıtyn bolady. Al 5-11 synyptar aýyldyq ákimdik ǵımaratynda 2 aýysymda oqı turady», - dedi B.Daýymova.
Jalpy, óńirde 129 bilim mekemesine aǵymdaǵy jóndeý júrgizilip jatyr. Bul maqsatqa aýdan jáne qala bıýdjetterinen, sondaı-aq demeýshiler qarjysynan 420 mln teńge bólingen.
Basqarma basshysy aıtqandaı, oblysta jalpy bilim beretin mektepterdiń sany men sapasy saı emes. Sondyqtan bıylǵy jaz aýdan ákimdikteriniń sheshimimen 5 mektep jabylyp, 7 mektep ortadan negizgige jáne negizgiden bastaýyshqa kóshken. Buǵan deıin oblysta 514 mektep jumys istep kelse, qazir onyń 509-y qalǵan. Onyń 345-i shaǵyn keshendi. Memlekettik tilde oqytatyn 122 mektep bar.
Oblys mektepteriniń oqýlyq máselesi de sheshilip qoıǵan. Bıyl shákirtterdi oqýlyqpen jáne oqý-ádistemelik quraldarymen qamtýǵa oblystyq bıýdjetten qomaqty qarjy bólingen. Óńirlik bilim bólimderiniń barlyǵy baspahanalarmen kelisimshartqa otyrǵan. Oqýlyqtardyń qaı kúni jetkiziletini 15 tamyzǵa deıin belgili bolady.
Illıýstratsııalyq foto
