Mektep jasyndaǵy balalar arasynda aýrý kórsetkishi joǵary deńgeıde saqtalyp otyr - D. Nazarbaeva
ASTANA. 1 maýsym. QazAqparat - Mektepte bilim alatyn balalar arasyndaǵy aýrý kórsetkishi joǵary deńgeıde saqtalýda.
Búgin 1 maýsym - Balalardy qorǵaý kúnine oraı Parlament Májilisinde «Zańnama jáne tájirıbedegi qazaqstandyq balalardy jan-jaqty qorǵaý jolynda» atty taqyrypta ótip jatqan halyqaralyq konferentsııa barysynda depýtat Darıǵa Nazarbaeva osylaı málimdedi.
Depýtat D. Nazarbaevanyń pikirinshe, mektep jasyndaǵy balalar jaǵdaıyn aıqyndaıtyn kórsetkish asa alańdatarlyq jáne keshendi sheshimdi talap etedi. «Bul rette eń aldymen erte bastan dıagnostıkaǵa, sondaı-aq balalar aýrýlarynyń aldyn alýǵa basa mán berý kerek. Prezıdent halyq toptarynyń densaýlyq jaǵdaıyn qadaǵalaýdyń ulttyq baǵdarlama keshenin engizý týraly mindet júktedi. Bul másele Májilis depýtattarynyń udaıy nazarynda. Ásirese, joǵary sapaly medıtsınalyq kómekti qajet etetin aýyr naýqas túrleri boıynsha qamtylatyn máselelerge basa nazar aýdarý qajet»,-dedi D. Nazarbaeva.
Sonymen qatar depýtat, balalar densaýlyǵyn saqtaý máselesinde olardy 100 paıyz sportqa tartý sharasynyń erekshe mańyzdy ekenin, sondaı-aq osy ortada salaýatty ómir saltyn udaıy nasaıhattaý qajettigin jetkizdi.
