Mektep jasyndaǵy 2 mln bala dene shynyqtyrý úıirmelerimen qamtylǵan – mınıstrlik
NUR-SULTAN. QazAqparat – Respýblıkada balalar men jasóspirimderdiń 652 klýby jáne 138 dene shynyqtyrý klýby bar. Bul týraly QR Mádenıet jáne sport mınıstri Dáýren Abaev aıtyp berdi, dep habarlaıdy QazAqparat tilshisi.
«Biz halyq arasynda, ásirese balalar men jasóspirimder arasyndaǵy buqaralyq sportty damytýǵa basa nazar aýdaryp kelemiz. Sonyń ishinde jalpy bilim beretin mektepterdiń oqýshylary erekshe qamtylyp otyr. Mektep jasyndaǵy jalpy oqýshylardyń 2 mıllıony dene shynyqtyrýmen, sportpen qamtylǵan. Respýblıkada balalar men jasóspirimderdiń 652 klýby jáne 138 dene shynyqtyrý klýby bar, ondaǵy balalar men jasóspirimderdiń sany – 200 myńnan asady», - dedi D. Abaev Úkimet otyrysynda.
Mınıstrdiń aıtýynsha, bul baǵytta birneshe joba júzege asyrylyp jatyr.
«Elimizdiń 7 qalasynda «Qoljetimdi sport» baǵdarlamasy jumys istep tur. Atalǵan baǵdarlama 20 myńnan asa adamdy qamtıdy. 10 sport túri boıynsha ulttyq mektep lıgasy uıymdastyryldy, bul mektep jasyndaǵy 2,7 mln-nan astam balany qamtydy. Jergilikti atqarý organdarymen birigip sporttyq ınfraqurylymdy damytýdyń jospar-kestesi ázirlendi. Ol 113 jańa nysan salý, 21 nysandy jetildirý jáne 6 iri nysandy qosymsha jabdyqtaýdan turady», - dedi Dáýren Abaev.
Buǵan deıin Dáýren Abaev balalarǵa arnalǵan mádenı jobalardy tanystyrǵan edi.
