Mektep úshin túlekterden aqsha jınalýda degen shyndyqqa janaspaıdy - Ahmetov

ASTANA. QazAqparat - Robototehnıka kabınetteri úshin mektep túlekterinen aqsha jınalyp jatqany týraly áńgime negizsiz. Bul týraly búgin OKQ ótken brıfıng barysynda ShQO ákimi Danıal Ahmetov málim etti, dep habarlaıdy «QazAqparat» HAA tilshisi.

Óńir ákimi árbir mektep túlekteri ózi oqyǵan bilim ordasy úshin 5 mıllıon teńge jınaýyna baılanysty shyqqan alyp-qashpa áńgimege óziniń pikirin bildirdi.

«Bul shyndyqqa janaspaıdy. Robotehnıka boıynsha (...) tek qana bizdiń bıznesmender ózderi 2,3 mlrd teńge jınap berdi. Keıbir kezde jalpy sózdi estip, sony aıta beremiz. Ol negizsiz áńgime.», - dedi Danıal Ahmetov.

Eske sala ketsek, Óskemen qalasynda qazan aıynda Shyǵys Qazaqstan oblysynyń barlyq kásipkerleriniń bas qosýymen «Týǵan jer» atty aýqymdy forým bolyp ótken bolatyn. Shara barysynda Shyǵys Qazaqstannyń kásipkerleri óńirdiń damýyna úlesterin qosyp, «Rýhanı jańǵyrý» baǵdarlamasy aıasynda «Meniń mektebim» atty jobasy aıasynda 2,3 mlrd teńge jınap bergen edi. Óńir bıligi osyǵan deıin jınalǵan qarajat aımaqtaǵy barlyq mektepterge robototehnıka kabınetin ashýǵa jumsalatynyn habarlaǵan bolatyn.