Mektep túlekteri UBT-ny tapsyrý kezinde uıaly telefondy paıdalana almaıdy
ANA. 24 mamyr. QazAqparat /Aıdar Ospanalıev/ - Bıyl Ulttyq biryńǵaı testileý (UBT) barysynda uıaly telefon baılanystaryna kedergi keltiretin qurylǵylar paıdalanylatyn boldy.
Bul týraly búgin jýrnalıstermen bolǵan baspasóz máslıhatynda Bilim jáne ǵylym vıtse-mınıstri Serik Yrsalıev aıtty.
Onyń sózine qaraǵanda, elimizde birneshe jyldan beri test jaýaptary jónindegi málimetterdiń taratylýy jónindegi áńgime tyıyldy. Óıtkeni UBT júıesiniń mazmuny men durys jaýaptardyń kodtary memlekettik qupııalardyń qataryna jatqyzyldy. «Soǵan qarmastan biz qazir UBT-ny júze asyrý barysynda aıtarlyqtaı kedergilerge tap bolyp otyrmyz. Ol, ásirese aýyldyq aımaqtarda úlken problema týdyrýda. Jalpy UBT sharasy barysynda kezdesken problemalardy 4 túrge bólip qarastyrýǵa bolady. Olardyń birinshisi - testileý kezinde uıaly telefondardy jappaı qoldaný áreketteri. Qazir tehnıkanyń óte myqty damyǵan zamany. Uıaly telefondarda neshe túrli qyzmet túrleri bar. Bizdiń túlekterimiz tehnıkanyń osy múmkindikterin testileý sharasy barysynda barynsha paıdalanyp qalýǵa tyrysýda»,-deıdi vıtse-mınıstr.
Onyń aıtýynsha, emtıhanǵa kirer kezde UBT tapsyrýshylar arnaıy temirizdegish qural arqyly tekserýden ótedi. Soǵan qarmastan keıbir jastar emtıhanǵa uıaly telefonyn alyp ótýdiń kózin taýyp júr. Al uıaly telefon arqyly emtıhan tapsyrýdyń neshe túrli qıturqy áreketterin júzege asyrýǵa bolady. Mysaly emtıhan tapsyrýshy túlekter telefondy paıdalanyp, ózderine berilgen tapsyrmany sýretke túsirip alyp, sms habar arqyly syrttaǵy «qamqorshysyna» beredi. Al ol testtiń jaýabyn jazyp, sms arqyly qaıta jiberedi.
«Ótken jyly myńdaǵan uıaly telefon emtıhanǵa kirer jerden jáne emtıhandy tapsyrý barysynda alyndy. Testileý kezinde emtıhandy jaqsy tapsyrady degen bir top azamattardy uıymdastyryp, olardy emtıhan ótetin zaldyń janyndaǵy bólmege jasyryp qoıý áreketteri de oryn aldy. Osy tektes azamattardy Ulttyq qaýipsizdik qyzmeti men qarjy polıtsııasynyń ókilderi jyl saıyn ustaıdy»,-dedi S.Yrsalıev.
Sondaı-aq ol sózinde testileý sharasynyń barysynda emtıhan tapsyratyn túlektiń qujatymen oǵan uqsaıtyn ózge azamatty kirgizip jiberý jaǵdaıy da oryn alyp otyrǵandyǵyn jetkizdi. «Jergilikti jerlerde UBT-ǵa qatysatyn dálizdegi kezekshi nemese qujattardy tekserýshi sııaqty qyzmetkerlerdiń ózderiniń týystaryna nemese aldyn ala kelisilgen adamdaryna zańsyz kómek kórsetýge tyrysý áreketteri de oryn alyp otyr. Sondyqtan bıylǵy jyly emtıhan tapsyratyn túlekterge júkteletin jaýapkershilik qataıtyldy. Atap aıtqanda, buryn emtıhan tapsyrýshynyń emtıhannan shyǵaryp jiberý isin jerilikti komıssııa sheshetin bolsa, endi bul qyzmetti Bilim jáne ǵylym mınıstrliginiń ókilderi sheshedi. Eger emtıhan tapsyryp jatqan baladan uıaly telefon nemese ózge de zańǵa qaıshy zattar tabylsa, ol bala emtıhannan shyǵarylady. Biz sonymen qatar bilim berý uıymdary basshylarynyń da jaýapkershiligin arttyramyz»,-dedi S.Yrsalıev.
