Mektep túleginiń ólimi: Aıyptalýshy marqumnyń ata-anasynan keshirim surady
AQTÓBE. QazAqparat - Aqtóbe oblystyq qylmystyq ister jónindegi mamandandyrylǵan aýdanaralyq sotynda mektep túlegine qatysty sot otyrysy jalǵasyp jatyr. Aıyptalýshy kózine jas alyp, qaza bolǵan A.Dúsipovtyń ata-anasynan keshirim surady, dep habarlaıdy QazAqparat tilshisi.
Búgin sot otyrysynda aldymen aıyptalýshy Bekzat Keńshilikten jaýap alyndy. Ol óz sózin keshirim suraýdan bastap, óziniń esh aram oıy bolmaǵanynyn jetkizdi.
«Azattyń ata-anasy jáne týystary, shyn júregimmen, basymdy ıip sizderden keshirim suraımyn. Jasaǵan qylmysymdy jáne sizderdiń aldyńyzdaǵy kinámdy eshqashan jýyp-shaıa almaımyn. Biraq mende Azatty óltirý túgili, oǵan aýyr jaraqat keltirý týraly oıym bolmady. Jasaǵan qylmysymdy moıyndaımyn, biraq ol qasaqana emes. Qylmys jasaǵanym ras, biraq aram oıly, jaman bala emespin. Jazamdy óteýge daıynmyn, biraq bári ádiletti bolýy tıis. Sebebi, maǵan taǵylǵan aıyp jasaǵan is-áreketterime múlde sáıkes kelmeıdi. Ózim Aqtóbe oblystyq mamandandyrylǵan fızıka-matematıka mektep-ınternatyn bitirdim. 25 mamyr kúni synyptastarymyzben, ata-anamyzben demalys bazasyna bardyq. Jaqsy kóńil-kúımen taraǵan soń Aıda Álibekova habarlasyp, meni Azattyń izdep júrgenin aıtty. Arada 2-3 kún ótken soń Azat Dúsipovtyń ózi jazdy. Bı alańyndaǵy jaǵdaıdy aıtqanda keshirim suradym. Ol toqtamaı, balaǵattady. Qyzdar birneshe kún ótken soń Azattyń men týraly aqparat jınap júrgenin taǵy da aıtyp berdi. 15 maýsym kúni «Altyn belgi» ıelerin marapattaý rásimine qatystym. Sol kezde Azatty kórip, ol meni taǵy balaǵattady»,- dedi aıyptalýshy Beknaz Keńshilik.
Eki túlek 18 maýsym kúni kezdeseýge kelisken. Biraq 17 maýsym kúni aıyptalýshy Beknaz Keńshilik qyzdarǵa telefon shalyp, qydyrýdy usynady. Keshkilik qydyryp, qyzdardy shyǵaryp salý kezinde aıyptalýshy taǵy Azat Dúsipovty kezdestiredi.
«Taldardyń arasyna aparyp, «osy jerden aman shyqpaısyń» dep aıtty. Qatty qoryqtym. Sebebi, Azattyń boıy uzyn, deneli boldy. Namysyma tıetin sózderdi aıtpaýdy suradym. Biraq tyńdamaı, anama qatysty las sózder aıtty. Men úshin eń qymbat jan ana bolǵandyqtan bul sózderi namysyma tıdi. Keıin meni urdy. Es jııa almaı, basym aınaldy. Ári qaraı ne bolǵanyn aıta almaımyn. Qaltamda bolǵan pyshaq jerge túskende ony alǵanymdy bilemin. Pyshaqty siltep qaldym. Azat «pyshaq» dep aıqaılady. Ári qaraı taksıde otyrǵanymdy jáne ózimniń úıimde bolǵanymdy bilemin. Qatty kúızeliste boldym. Azattyń qaıtys bolǵanyn ákem aıtty»,- dedi aıyptalýshy B.Keńshilik.
Eske salsaq, Aqtóbe qalasyndaǵy №19 orta mektep túlegi Azat Dúsipov pyshaq jaraqatynan kóz jumdy. Buǵan deıin habarlaǵanymyzdaı, oqıǵa maýsym aıynyń 17-nen 18-ne qaraǵan túni Aqtóbe qalasynyń Týrgenev kóshesinde bolǵan.
