Mektep te, sapa da joq: Atyraýda oqýshylar men ustazdar apatty mektep máselesin shuǵyl sheshýdi talap etti
ATYRAÝ. KAZINFORM — Atyraý qalasyndaǵy M.Lomonosov atyndaǵy mekteptiń oqýshylary 2 jyldan beri eki ǵımaratta oqyp júr. Óıtkeni, apatty mektep buzylyp, ornyna jańasy salynýy tıis. Alaıda qurylys áli kúnge bastalǵan joq.
Oqýshylar men ustazdar sapaly bilim protsesin uıymdastyrýdy talap etip, áleýmettik jeli arqyly bılik ókilderinen máseleni tezirek sheshýdi surady. Bul mektep 2023 jyly tehnıkalyq saraptamanyń negizinde apatty dep tanylǵan. Sońǵy eki oqý jylynan beri Jangeldın atyndaǵy orta mektepte bastaýysh synyptyń 389 oqýshysy, al qalǵan 650-ge jýyq shákirt Maqash Bekmuhambetov atyndaǵy bilim ordasynda oqyp jatyr.
— Oqýshylar úsh aýysymda bilim alyp jatyr, tipti balalar shamadan tys tolǵan synyptarda oqýǵa májbúr. Toǵyz kabınette myńnan astam oqýshy bilim alady. Barlyq oqýshyny qamtý úshin sabaq uzaqtyǵy qysqartylǵan. Mundaı jaǵdaı bilim sapasyna, balalardyń densaýlyǵyna jáne muǵalimderdiń eńbek jaǵdaıyna keri áserin tıgizip otyr. Mekteptiń qarjylandyrýy biz basqa mekteptiń ǵımaratynda ornalasqanbyz degen syltaýmen toqtatylǵan. Qazir ınteraktıvti panelder týraly aıtpaǵanda muǵalimderde qarapaıym tsıfrlyq quraldardyń ózi joq. Muǵalimder bar jaǵdaıǵa beıimdelip, qoldarynan kelgenshe jumys isteýge májbúr, — dep áleýmettik jeli arqyly pikir bildirgen ustazdar.
Pedagogterdiń sózinshe, mektep qurylysy bastalady degeli 5 jyl ýaqyt ótti. Atyraý oblysy ákimdigi búginde mektep aýmaqtarynyń kólemine joǵary talaptar qoıylǵandyqtan, oqý korpýstaryn, sport alańdaryn, avtoturaqtardy jáne basqa da nysandy salý úshin qala ákimdigi memlekettik qajettilikter úshin jer ýchaskelerin alyp qoıý rásimderin bastaǵanyn málimdedi.
— Atalǵan rásim birneshe kezeńnen turady jáne múlikti baǵalaý, quqyq ıelerin habardar etý, ótemaqy tóleý, sondaı-aq keıbir jaǵdaılarda daýlardy sot arqyly retteýdi qamtıdy. Zańda kózdelgen barlyq kezeńniń saqtalýy daıyndyq jumystarynyń merziminiń uzaraýyna sebep, — dedi oblystyq bilim berý basqarmasynyń baspasóz qyzmeti.
Atyraý qalalyq bilim bóliminiń basshysy Aınagúl Dúısekenovanyń aıtýynsha, oblystyq ákimdikke 900 oryndyq mektep qajettiligi týraly salaralyq qorytyndyny joldaǵan.
— Oblystyq qurylys basqarmasynyń aqparatyna sáıkes, 900 oryndyq mekteptiń jobasy daıyndalyp, memlekettik saraptamaǵa jiberilgen. Qurylys aıaqtalǵannan keıin oqýshylar jańa mektepke kóshiriledi. Qazir oblys ortalyǵynda 4 mektep apatty dep tanylǵan. Bul mektepterdiń oqýshylary jasaqtalǵan algorıtm negizinde bilim alyp jatyr, — dedi Aınagúl Dúısekenova.
Óńirge jumys saparymen kelgen Oqý-aǵartý mınıstriniń mektep dırektorlarymen ótken kezdesý kezinde oblys ákimi Serik Shápkenov M.Lomonosov atyndaǵy mekteptiń qurylysyn bıyl bastap, keler oqý jylyna deıin aıaqtaý josparlanyp otyrǵanyn aıtty.
Aıta keteıik, sońǵy júrgizilgen taldaýǵa sáıkes bul bilim ordasyndaǵy bilim sapasy 50 paıyzdan tómen, ıaǵnı 46,9% quraǵan.
Buǵan deıin pedagogterdi attestattaý júıesine ózgeris engiziletinin jazǵan edik.
