Mektep te, emhana da joq: Almaty ákimi renovatsııa baǵdarlamasyn synǵa aldy
ALMATY. KAZINFORM — Almaty ákimi Jetisý aýdanyndaǵy turǵyn úılerdi jóndeý baǵdarlamasymen barysymen tanysty.
Almaty ákimdiginen málim etkendeı, Krylov–Skrıabın–Goncharov–Raıymbek kósheleri aralyǵyndaǵy aýmaqta 16 úı buzylyp, turǵyndar jańadan salynǵan 9 úıge kóshirildi.
Budan bólek, taǵy 2 úıdiń qurylysy júrip jatyr. Botkın–Kazakov–Goncharov–Skrıabın–Raıymbek dańǵylynyń boıynda 6 úı súrilip, 3 úı turǵyzyldy.
Sondaı — aq 8 úıdiń qurylysy júrip jatyr, olardy 2027 jylǵa deıin paıdalanýǵa berý josparda. Sonymen qatar, jańǵyrtý baǵdarlamasynan tys jeke ınvestıtsııa esebinen 10 eski úı men 11 jeke turǵyn úıdi buzý kózdelgen.
–100 myń sharshy metr úı salyndy, birde-bir mektep, birde-bir balabaqsha, birde-bir emhana joq. Munyń bárin durys esepteýlerińiz kerek. Arhıtektorymyzǵa bárin qaıta esepteýdi tapsyramyn, — dedi Darhan Satybaldy.
Aýdanda halyq sanynyń ósýine baılanysty 4 myńnan astam oqýshy orny jetispeıdi.
Shahar ákimi 1 200 oqýshyǵa arnalǵan jańa mekteptiń qurylysymen tanysty. Mektep turǵyzyp jatqan merdiger kompanııa 4 myń páterlik turǵyn úı keshenin de salyp jatyr, onyń 2,3 myńyn jumysshy jastar men halyqtyń áleýmettik osal toptaryn baspanamen qamtýǵa arnalǵan áleýmettik baǵdarlamalar aıasynda ákimdik satyp almaq.
Osyny eskerip, qala basshysy bilim berý nysanynyń qurylysyn barynsha jedeldetýdi talap etti.
— Eger mektepti ýaqytynda tapsyrmasańyzdar — biz áleýmettik baǵdarlamalar úshin páter satyp almaımyz. Eshqandaı sóz bolmaıdy, tapsyrmasańyzdar — satyp almaımyz, — dedi Darhan Satybaldy.
Eske salaıyq, byltyr máslıhat sheshimimen Almaty qalasynyń 2030 jylǵa deıingi jańa turǵyn úıdi renovatsııalaý baǵdarlamasy bekitilgen bolatyn.
Qazir Almaty qalasynda 43 myńnan astam adam turatyn 1366 tozyǵy jetken úı bar, 2025 jyly baǵdarlamaǵa sáıkes 78 eski úı buzylady. Baǵdarlama aıasynda 2030 jylǵa deıin 676 eski kóppáterli turǵyn úıge renovatsııa júrgizý josparlanyp otyr.