Mektep sómkesin qalaı tańdaý kerek – dáriger keńesi

NUR-SULTAN. QazAqparat - QR Bas memlekettik sanıtary Jandarbek Bekshın mektep sómkesin tańdaý jóninde ata-analarǵa keńes berdi, dep habarlaıdy QazAqparat tilshisi.

Onyń aıtýynsha, mektep sómkesin tańdaýda birqatar qaǵıdalardy ustanǵan jón.

«Sómkeniń qatty ortopedııalyq arqalyǵy bolýy tıis, asynatyn baýlary jalpaq bolsyn jáne tutqasy uzyndyǵy boıynsha rettelýi kerek. Mektep sómkesiniń ólshemi men salmaǵy balanyń boıy men jas ereksheligine sáıkes kelýi kerek, bos sómkeniń salmaǵy 1 kg aspaýy tıis. Aýyr rıýkzakty alyp júrý skolıoz, osteohondroz, jaryq sııaqty aýrýlardy týǵyzýy múmkin», - dedi J. Bekshın Ortalyq kommýnıkatsııalar qyzmetinde ótken baspasóz máslıhatynda.

Oqýlyqtar salynǵan jalpy sómke salmaǵy bala salmaǵynyń 10 paıyzynan aspaýy tıis. Máselen, 1-3 synypta – 1,5-2 keli, 4-5 synypta – 2-2,5 keli, 6-7 synypta – 3-3,5 keli jáne 8-11 synypta – 4-4,5 keli bolýy kerek.

«Qarańǵyda jaryq shashatyn sómke tańdaý da - bala qaýipsizdigi úshin mańyzdy. Mundaı sómkeni tańǵy jáne keshki ýaqytta joldy kesip óterde kólik júrgizýshileri tez baıqaıdy», - dep atap ótti dáriger.

Ol mektepterdegi jeke shkaftyń sómke salmaǵyn barynsha jeńildetkenin eske saldy. Bul shara ásirese jasóspirimder arasynda tirek-qımyl apparaty aýrýlarynyń aldyn alady.

«Oqý protsesinde mektep oqýlyqtarynyń da mańyzy zor. Bir oqýlyqtyń salmaǵy sanıtarııalyq qaǵıdalarda kózdelgen normalardan aspaýy tıis. 1-4 synyp oqýlyqtary 300 gr, 5-6 synyp oqýlyqtary – 400 gr, 7-9 synypta – 500 gr. Jáne 10-12 synypta oqýlyqtar 600 grammnan aspaýy tıis», - dedi J. Bekshın.

Kórsetilgen salmaqtan asyp ketken oqýlyqtar boıynsha ata-ana [phone] nómirine nemese komıtet saıtyna shaǵymdana alady.