Mektep shtatyna erekshe qajettiligi bar balalardyń assıstenti engiziledi - Aımaǵambetov

NUR-SULTAN. QazAqparat - Jańa oqý jylynan bastap mektepterdiń shtatyna tıýtorlar nemese erekshe bilim qajettilikteri bar balalardyń assıstentteri engiziledi. Bul týraly QR Bilim jáne ǵylym mınıstri Ashat Aımaǵambetov Facebook paraqshasynda jazdy, dep habarlaıdy QazAqparat tilshisi.

«Qazaqstanda 63 myń úıirme men 1 200 qosymsha bilim beretin uıym jumys isteıdi. Qazir Oqýshylar saraılary, balalar tehnoparkteri, úıirmeler men óner mektepteri jáne taǵy basqalarynyń jelisin odan ári ulǵaıtý mindeti tur. Qaraǵandy, Kókshetaý, Túrkistan, Qyzylorda jáne ShQO sııaqty birneshe óńirde mundaı ortalyqtardyń qurylysy bastaldy, al Almaty qalasynda qaıta jóndeý jumystary júrgizilip jatyr. Basqa óńirlerde de atalǵan baǵyt boıynsha jumys atqarylyp jatyr», - dedi Ashat Aımaǵambetov.

Sonymen qatar mınıstr ınklıýzıvti bilim berýdi damytý – mańyzdy baǵyttardyń biri ekendigin basa aıtady.

«Psıhologııalyq-medıtsınalyq-pedagogıkalyq konsýltatsııa jumysy modernızatsııalanyp, túzetý ortalyqtarynyń (PPTK) jelisin keńeıtý máseleleri sheshilip jatyr. Qazirgi ýaqytta túzetý kómegine memlekettik tapsyrysty engizý máselesi qarastyrylyp jatyr. Bul shara bizge kómekke muqtaj balalardy tez arada qamtýǵa jáne olarǵa qajetti kómek kórsetýge múmkindik bereri sózsiz. Sebebi densaýlyqqa qatysty máselelerdi aldyn ala anyqtap, balalarǵa qoldaý kórsetý óte mańyzdy», - dedi ol.

Onyń atap ótýinshe, jańa oqý jylynan bastap Tıptik ózgerister boıynsha mektepterdiń shtatyna tıýtor nemese erekshe bilim qajettiligi bar balalardyń assıstenti engiziledi.

«Bilim uıymdarynda tosqaýylsyz orta qurýdan bólek, arnaıy baǵdarlamalar, ádistemeler, baǵalaý júıelerin engizý, pedagogterdiń erekshe qajettilikteri bar balalarmen jumys isteý daıyndyǵy men quzyretteri boıynsha basty nazarǵa alynady», - dedi mınıstr.