Mektep psıhologtary men synyp jetekshileri daıyndyq kýrsynan ótedi

ASTANA. QazAqparat - Aldaǵy ýaqytta 144 myńnan astam pedagog qaıta daıarlaý kýrsynan ótedi. Bul týraly búgin Úkimet úıindegi baspasóz máslıhatynda QR Bilim jáne ǵylym mınıstri Kúlásh Shamshıdınova aıtty, dep habarlaıdy QazAqparat tilshisi.

«Bilim salasynyń tómen jalaqy alatyn qyzmetkerleriniń jalaqysyn saralanǵan túrde 30 paıyzǵa deıin kóterý máselesi qarastyrylyp otyr. Bul rette eń aldymen eden jýýshy, santehnık, elektrık, kúzetshi syndy tehnıkalyq qyzmetkerdiń, sonymen qatar tárbıeshi, olardyń kómekshisi, balabaqshalar men kolledjderdiń psıhologtary syndy qyzmetkerlerdiń jalaqysy qaralady. Qazirgi tańda Eńbek jáne halyqty áleýmettik qorǵaý mınıstrligimen birlesip, qyzmetkerlerdiń sanattaryn jáne bolashaqta alatyn jalaqysyn esepteý jumystaryn júrgizip jatyrmyz», - dedi mınıstr.

Sonymen qatar, ol bilim salasynda eń aldymen muǵalimderdiń biliktiligin, kásibı sheberligin arttyrý qajettigin basa aıtty.

«2012 jyldan beri Elbasynyń, Úkimettiń tarapynan múǵalimderdiń kásiptiligin, sheberligin arttyrý úshin úlken jumystar atqarylyp jatyr. Bolashaqta da 144 myńnan astam pedagogıkalyq qyzmetker qaıta daıarlaý kýrsynan ótedi. Bıyl alǵash ret mektep psıhologtaryn jáne synyp jetekshilerin daıyndyq kýrsynan ótkizýdi josparlap otyrmyz. Qazir oqý baǵdarlamasy ázirlenip, daıyndalyp jatyr»,- dedi Kúlásh Shámshıdınova.