Mektep psıhologteriniń biliktiligi óte tómen — Oqý-aǵartý vıtse-mınıstri

ASTANA. KAZINFORM — Elimizde pedagog-psıhologterdiń biliktiligin arttyrý kýrsynyń mazmunyn ózgertip jatyr. Bul týraly Oqý-aǵartý mınıstriniń orynbasary Edil Ospan málim etti.

— Mamandardyń biliktilik máselesin sheshý kerektigimen kelisemiz. Mektepte jumys istep júrgen pedagog-psıhologtardyń, psıhologııalyq qoldaý ortalyqtarynan kelip jatqan mamandardyń biliktilik deńgeıi óte tómen ekenin kórip otyrmyz. Birneshe ret taldaý jasadyq, endigi qolymyzdan keletini biliktilikti arttyrý kýrstarynan ótkizý, bul jyl saıyn jasalyp kele jatyr. Qazir biliktilik kýrstarynyń mazmunyn qaıta qarap jatyrmyz, — dedi Edil Ospan Májilis qabyrǵasynda ótken is-shara barysynda. 

Odan ári vıtse-mınıstr pedagog-psıholog mamandaryn daıarlaý máselesine toqtaldy. 

— Bul baǵytta Ǵylym jáne joǵary bilim mınıstrligimen birlesip jumys istep jatyrmyz. Bizdegi aqparat boıynsha, pedagog-psıhologterdi daıarlaýdyń jańartylǵan modýli osy oqý jylynda engizildi, — deıdi ol.

Búgin Májilistiń Áleýmettik-mádenı damý komıtetinde psıhologııa qyzmetiniń problemalary men sheshý joldary qaraldy. 

Aıta keteıik, elimizde psıhologııalyq qyzmet týraly arnaıy zań jobasy qolǵa alyndy. 

Májilis depýtaty Ashat Aımaǵambetov elimizde psıhologııalyq qyzmet kórsetýdiń tıisti normalary bar, biraq ol shashyrańqy ekenin aıtty.