Mektep pen emhanalar: Almatyda 18 nysan seısmıkalyq turǵyda kúsheıtildi

ALMATY. KAZINFORM — Almatyda aldaǵy ýaqytta seısmıkalyq erte eskertý stantsııalary kóbeıedi.

Almaty qalasynyń Jumyldyrý daıyndyǵy, aýmaqtyq jáne azamattyq qorǵanys basqarmasynyń jaýabyna sáıkes, megapolıste elimiz boıynsha alǵashqy erte habarlaý júıesi engizildi. Qazir qala aýmaǵynda 28 erte eskertý stantsııasy ornatylǵan jáne olar Mass Alert júıesimen baılanysqan. Al 2026 jyldyń sońyna deıin jańa 70 stantsııany ornatylady.

— Qazirgi ýaqytta 30 datchıkti ornatý úshin oryndardyń naqty ornalasýyn anyqtaýǵa baǵyttalǵan ǵylymı-zertteý jáne dalalyq jumystardyń nátıjeleri túzetildi. Jabdyqtar satyp alynyp, stantsııalardy ornatý úshin qurylys-montajdaý jumystary júrgizilip jatyr. Kelesi jyly 40 jańa stantsııany ornatý jumystary jalǵasady, — dep habarlady basqarmadan.

Vedomstvo qala boıynsha 843 sırenalyq-dybys qondyrǵylary bar ekenin atap ótti. Olar mektep, aýrýhana, balabaqsha syndy 530-dan astam nysanmen baılanysqan. Sondaı-aq almatylyqtar jer silkinisi kezinde bara alatyn 8 aýdan boıynsha 384 halyqty qabyldaý pýnktteri bar.

— Respýblıka aýmaǵynda ornalasqan 98 seısmıkalyq stantsııa men baqylaý pýnktteri negizinde seısmıkalyq belsendilikke turaqty monıtorıng júrgiziledi. Qaladaǵy seısmıkalyq jaǵdaı jónindegi komıssııanyń otyrysy apta saıyn túsetin qorytyndylarǵa sáıkes ótkiziledi. Stantsııalarda 160 túrli parametr boıynsha seısmologııalyq, geofızıkalyq, gıdrogeologııalyq baqylaýlar júrgiziledi, — dep túsindirdi basqarmadan.

Odan bólek Almatyda 2024-2025 jyldary 18 nysanda seısmıkalyq kúsheıtý jumystary júrgizilgen. Atap aıtqanda, 15 bilim berý jáne 3 medıtsına mekemesi.

Eske salaıyq, ótken aıda almatylyqtarǵa jer silkinisi týraly habarlama keldi.

Keıin Almaty mańynda jer dúmpýi bolǵany belgili anyqtaldy.

TJM Almatydaǵy 28 seısmostantsııanyń biri jer silkinisin tirkep, habarlandyrý jibergenin málimdedi.