Mektep pen aýrýhana salynbaǵan aýdandarda kópqabatty úıler salýǵa tyıym salynady
30 jyldan kóp paıdalanylyp kele jatqan mektep, balabaqsha men kolledjderdiń ǵımarattary ár 5 jyl saıyn apattylyq qaýpine tekseriledi. Bul týraly Májilistiń jalpy otyrysynda «Qazaqstan Respýblıkasynyń keıbir zańnamalyq aktilerine bilim berý jáne tálimgerlik máseleleri boıynsha ózgerister men tolyqtyrýlar engizý týraly» zań jobasyn talqylaý kezinde depýtat Ashat Aımaǵambetov málim etti, dep habarlaıdy Kazinform.
«Balalardyń qaýipsizdigine jáne quqyqtaryn qorǵaýǵa qatysty tıisti normalar engizildi. Keıingi kezde mektep ǵımarattarynyń tóbeleriniń qulaýy sııaqty faktiler jıilep ketti. Sondyqtan, osyndaı biraz jyldar boıy jumys istep turǵan ǵımarattardy ár 5 jyl saıyn tekserip turý óte mańyzdy dep sanaımyz. Zań jobasynda 30 jyldan kóp paıdalanyp kele jatqan mektep, balabaqsha men kolledjderdiń ǵımarattaryn ár 5 jyl saıyn apattylyq qaýpine tekserý týraly norma usynyldy», – dedi A. Aımaǵambetov.
Aıtýynsha, taǵy bir problema kishkentaı balalardyń terezelerden qulaýyna qatysty.
Ókinishke qaraı keıingi eki jylda júzdegen bala terezeden qulap ketken. Osyǵan oraı zań jobasymen terezelerdi arnaıy qaýipsizdik mehanızmderimen nemese qulyptarmen qamtamasyz etý mindetteledi. Sondaı-aq depýtat mektep qurylysy máselesin kóterdi.
«Bizde áleýmettik nysandarmen, mektep jáne balabaqshalarmen qamtamasyz etip almaı turyp kópqabatty úılerdi salý problemasy bar. Ásirese, úlken megapolısterde bul problema úshyǵyp tur. Osynyń kesirinen júmys istep turǵan mektep úsh aýysymǵa kóshedi, balalardyń densaýlyǵyna qaýip tónedi, al endi mektep salaıyn dese jaqyn jerde bos jer de qalmaıdy. Osyǵan oraı zań jobasyna jańa talap engizildi. Endi mektep, balabaqsha men aýrýhanany salyp almaı turyp, osyndaı kópqabatty turǵyn úılerdi turǵyzýǵa tyıym salynady», – dedi Ashat Aımaǵambetov.
