Mektep pen ata-analar arasynda kelisimsharttar ne úshin rásimdeledi
ASTANA. QazAqparat - Atalǵan bastama alǵash ret bıylǵy oqý jylynan bastap engiziledi, dep xabarlaıdy QazAqparat tilshisi.
QR Bilim jáne ǵylym mınıstri Erlan Saǵadıevtiń aıtýynsha, mektep pen ata-analar arasynda naqty kelisimshart bolsa, árbireýi óz mindetterin biletin bolady. Oǵan qosa, mektep muǵalimderine artyq salmaq túspeıdi. "Biz mektep pen ata-ana arasynda kelisimshart jasaýdy alǵash ret engizdik. Atalǵan qujatpen muǵalimder men mektep admınıstratsııasynyń quqyǵyn qorǵap, mindetterin retteýge bolady. Sebebi bizge eki taraptyń óz mindetterin jáne quqyǵyn biletin jáne oryndaıtyn júıe qalyptastyrý óte mańyzdy. Osynyń barlyǵy - muǵalimniń jumysyn jeńildetýge baǵyttalǵan sharalar", - dedi E.Saǵadıev Tamyz konferentsııasynyń plenarlyq májilisinde.
Aıta keteıik, bıyl mınıstrlik muǵalimderdiń júktemesine qatysty arnaıy buıryq ta shyǵardy. Oǵan sáıkes, mektep muǵalimi tek 5 qujatty ǵana toltyrýǵa mindetti. Odan artyq salmaq salynsa, mektep basshylyǵynyń ústinen aryz túsirýge bolady. QR Bilim jáne ǵylym vıtse-mınıstri Asxat Aımaǵambetovtyń aıtýynsha, atalǵan másele jıi kóteriledi. Sebebi muǵalimder qaǵazbasty jumystan bosamaıdy. Olardy kóptegen qujattardy toltyrýǵa mindetteıdi. "Osyǵan baılanysty bilim jáne ǵylym mınıstrligi bıyl arnaıy buıryq shyǵardy. Onda mektep muǵalimi toltyratyn qujattardyń naqty tizimi kórsetilgen. Bes qujat qana, ol - jýrnal, kúndelik, balalardy sýmatıvti-formatıvti baǵalaý, kúntizbelik jáne pándik jospar. Boldy. Muǵalim tek osy qujattardy ǵana toltyrýǵa mindetti. Basqasyna ýaqyt ketirýge mindetti emes", - dedi A.Aımaǵambetov.
Onyń aıtýynsha, muǵalimderdiń júktemesin odan artyq kóterýge bolmaıdy. Mektep basshylyǵy artyq jumys berse, aryz túsirýge bolady. "Bilimdi baqylaý departamentine xabarlasýǵa bolady. Ondaı departamentter barlyq oblystarda bar. Aryz tússe, tıisti sharalar qolǵa alynady", - dep atap kórsetti A.Aımaǵambetov.
