Mektep pánderiniń mazmuny jasandy ıntellekt baǵytynda jańartylyp jatyr
ASTANA. KAZINFORM - Tehnologııalardyń qarqyndy damýy, eńbek naryǵy talaptarynyń ózgerýi jáne jasandy ıntellektiniń ómirdiń barlyq salasyna keńinen enýine baılanysty bilim berý mazmunyn jańartý boıynsha júıeli jumys júrgizilip jatyr. Bul týraly Oqý-aǵartý mınıstrligi habarlady.
Bul jumys Memleket basshysy Qasym-Jomart Toqaevtyń 2025 jylǵy Respýblıkalyq pedagogterdiń tamyz konferentsııasynda bergen tapsyrmasyna sáıkes qolǵa alynyp, sol jyldyń qyrkúıeginen bastap kezeń-kezeńimen iske asyrylyp keledi.
Keıin bul baǵyttaǵy jumystyń quqyqtyq negizi nyǵaıtyldy. 2025 jylǵy qarashada «Jasandy ıntellekt týraly» Qazaqstan Respýblıkasynyń Zańy, al 2026 jylǵy mamyrda orta bilim berý júıesine jasandy ıntellektini engizý jónindegi Prezıdent Jarlyǵy qabyldandy.
Osy qujattardy iske asyrý aıasynda memlekettik jalpyǵa mindetti bilim berý standarty, úlgilik oqý josparlary men úlgilik oqý baǵdarlamalary jańartyldy. 1-4-synyptardaǵy «Tsıfrlyq saýattylyq» pániniń ataýy «Tsıfrlyq saýattylyq jáne jasandy ıntellekt», al 5-11-synyptardaǵy «Informatıka» pániniń ataýy «Informatıka jáne jasandy ıntellekt» bolyp ózgertildi.
Bul tek pán ataýlarynyń ózgerýi emes. Jasandy ıntellekt tsıfrlyq tehnologııalar men ınformatıkanyń ajyramas bóligine aınaldy. Osyǵan baılanysty pánderdiń mazmunyna jasandy ıntellekt boıynsha jańa bólimder men barlyǵy 43 oqý maqsaty engizildi.
Búginde oqýshylar jasandy ıntellekt quraldaryn kúndelikti ómirde qoldanyp júr. Endigi mindet – olardy bul tehnologııany jaı ǵana paıdalanýǵa emes, sanaly, tıimdi jáne jaýapty qoldanýǵa úıretý.
1-4-synyp oqýshylary «Medıasaýattylyq jáne JI» bólimi aıasyndaǵy 17 oqý maqsaty boıynsha jasandy ıntellektimen kúndelikti ómirden alynǵan qarapaıym mysaldar arqyly tanysady. Olar tsıfrlyq qaýipsizdik, jeke derekterdi qorǵaý jáne tsıfrlyq ortadaǵy jaýapty minez-qulyq negizderin meńgeredi.
5-9-synyp oqýshylary «Kompıýterlik oılaý jáne baǵdarlamalaý», «Densaýlyq, qaýipsizdik jáne JI» bólimderi aıasyndaǵy 14 oqý maqsaty boıynsha jasandy ıntellekt quraldaryn oqý protsesinde tıimdi qoldanýdy, saýatty suranystar qurastyrýdy, alynǵan nátıjelerdi synı turǵydan baǵalaýdy, sondaı-aq kıberqaýipsizdik pen akademııalyq adaldyq qaǵıdattaryn saqtaýdy úırenedi.
10-11-synyptarda «Derekterdi basqarý jáne jasandy ıntellekt» bólimi aıasyndaǵy 12 oqý maqsaty boıynsha jasandy ıntellektiniń jumys isteý qaǵıdattaryn túsinýge jáne ony praktıkada qoldanýǵa basymdyq beriledi.
Oqý mazmunyna mashınalyq oqytý, neırondyq jeliler, derekterdi taldaý jáne qoldanbaly krıptografııa negizderi engizilgen. Jańartylǵan oqý baǵdarlamalary ótken oqý jylynda aprobatsııadan sátti ótip, oń saraptamalyq qorytyndy aldy. Qazirgi ýaqytta olar belgilengen tártippen bekitilý satysynda.
Sonymen qatar pedagogter úshin bilim berý protsesinde jasandy ıntellektini tıimdi jáne qaýipsiz qoldaný jónindegi ádistemelik usynymdar ázirlenip jatyr.
Buǵan deıin mınıstrlik jańa oqý jylyna deıin oqýlyqtar jańartylyp, anyqtalǵan qateler túzetiletinin habarlaǵan edi.
