Mektep pánderin aǵylshyn tilinde oqytatyn muǵalimder qalaı daıarlanyp jatyr
Vıtse-mınıstrdiń aıtýynsha, búginde aǵylshyn tilinde sabaq beretin mektep muǵalimderiniń tapshylyǵy bar. Osy ýaqytqa deıin bir top muǵalimder biliktilikti kóterý kýrstary aıasynda daıarlandy.
«Sonymen qatar, aǵylshyn tili boıynsha magıstratýraǵa adam jınadyq. Máselen, 2016 jyly 200-deı adamdy qabyldadyq. Sosyn taǵy 600 adamdaı bakalavrıatqa tústi. Byltyr olardyń sany 900-ge deıin jetti. 2021-2022 jyldary joǵary oryndarynan daıyn, aǵylshyn tilinde tolyqqandy sabaq beretin muǵalimder shyǵady dep otyrmyz», - dedi T.Eshenqulov QR Parlament Májilisinde ótken dóńgelek ústelde.
Onyń aıtýynsha, aǵylshyn tilinde sabaq beretin mamandardyń biliktiligi ulttyq testimen tekseriledi.
«Ony pedagogıkalyq joǵary oqý oryndarynyń bıylǵy túlekteri de tapsyrady. Bir sózben aıtqanda, ulttyq testileýden ótpegen mamanǵa pedagogtik qyzmet jasaýǵa ruqsat berilmeıdi», - dep atap kórsetti T.Eshenqulov.
Aıta keteıik, bıyl bilim granttaryn taǵaıyndaý júıesinde ózgerister bolady. Joǵary oqý oryndaryn jan basyna qaraı qarjylandyrý júıesine basymdyq beriledi. Máselen, UBT-da joǵary upaı alǵan mektep túlegi qaı oqý ornyn tańdasa, sol jerge grant beriledi.
«Ótken jyly atalǵan bastama magıstratýda 21 mamandyq boıynsha synaqtan ótkizilgen bolatyn. Bıyl zań normalary boıynsha magıstratýra bólimi grant taǵaıyndaýdyń jańa modeline tolyǵymen kóshedi. Osynyń arqasynda magıstratýraǵa túsken adam grantty alady da, joǵary oqý ornyn ózi tańdaıdy», - deıdi T.Eshenqulov. Budan bólek, mektep túlekterine mamandyqty tańdaý jaǵy jeńildeı túsedi.
