Mektep oqýshysynyń anasy «Jas otbasy» mektebin qurýdy usyndy
NUR-SULTAN. QazAqparat - Elimizde «Jas otbasy» mektebin, Ata-analar qaýymdastyǵyn qurý qajet. Mundaı usynysty búgin elordada ótip jatqan Tamyz konferentsııasynda Oral qalasyndaǵy №44 mektep oqýshysynyń anasy Klara Rızýanova jasady, dep habarlaıdy QazAqparat tilshisi.
«Qazaq el bolamyn deseń besigińdi túze» dep bala tárbıesine qaı kezde de erekshe nazar aýdarǵan. Babalarymyzdyń osy qaǵıdasyn berik ustanatyn bolsaq, biz muratymyzǵa jetemiz. Biz osy qaǵıdany múltiksiz oryndap júrmiz be? Men ákelerinen erte qalǵan 7 bala ósirip, tárbıelep, joǵary bilim alýlaryna, ómirden óz oryndaryn tabýlaryna jaǵdaı jasap otyrǵan anamyn«, - dedi ol.
Osy rette oqýshy anasy búgingi múmkindikti paıdalana otyryp, mekteptegi bilim berý men tárbıe arasyndaǵy sabaqtastyqtyń joqtyǵy qoǵamda dertke ulasyp bara jatqanyna nazar aýdartty.
»Adamzattyń ekinshi ustazy atanǵan Ál-Farabı babamyz osydan 11 ǵasyr buryn «Tárbıesiz berilgen bilim adamzattyń qas jaýy» dep aıtyp ketken. Qazirgi kezde jastar arasynda quqyq buzýshylyqtyń kóbeıýi, zııandy áreketterge áýestenýi, ata-analary men ustazdaryn syılamaýy beleń alýda. Biz muny kúdelikti áleýmettik jeliden kórip otyrmyz. Mysaly Túrkistan qalasyndaǵy bala zorlyǵy, qatygezdikpen bir-birinen ósh alýy, Almaty oblysyndaǵy óz anasyn jaýyzdyqpen óltirgen mektep oqýshysy, Taldyqorǵan qalasyndaǵy uıaly telefonǵa shekteý qoıǵany úshin ózine qol jumsaǵan oqýshy, erte júktiliktiń kóbeıýi sııaqty jantúrshigerlik oqıǵalarǵa kýá bolýdamyz. Al mektep pen ata-ana bolsa, máseleni birlesip sheshýdiń ornyna kinálini izdeýde. Árbir mekteptiń tárbıe jumysy bar. Ata-analar da baalarymyzdy tárbıesiz qaldyrmaımyz. Osyǵan qaramastan jastarymyzdyń týra joldan adasyp, qatelikke boı urýy nelikten? Bul máseleniń sheshimi qandaı? Jalpy «ustaz aldyn kórgen» degen sóz «ana tárbıesin alǵan» degen uǵymmen ushtasyp jatatyndyǵy belgili. Biraq, biz, ata-analar balarymyzdyń mektepte 4-5 saǵattan artyq bolmaıtynyn eskerýimiz qajet«, - dedi K.Rızýanova.
Osy oraıda ol ata-analar keıde muǵalimge qurmetpen emes, syn kózimen qarap, keıbir sózderin joqqa shyǵaratyndyǵyn atap ótti. Sondyqtan ustaz eńbegin balaǵa sezdirtýdiń aldynda óz tarapymyzdan muǵalimge degen qurmetti kúsheıtýimiz qajettigine nazar aýdartty.
»Bala tárbıesindegi otbasynyń róli zor. Bul qundylyqtardy urpaqqa jetkizý úshin muny qalypty daǵdyǵa aınaldyrýymyz qajet. Qazir barlyq óńirde ata-analardy qoldaıtyn resýrstyq ortalyqtar bar. Munyń bári jaqsy. Biraq, biz keleńsizdikterdiń saldarymen ǵana kúresýdemiz. Al, durysynda adamgershilik tárbıeni, ulttyq qundylyqtardy bala boıyna erte bastan sińirýimiz qajet. Osy maqsatta «Jas otbasy» mektebin ashýdy usynamyn. Sonymen birge qoǵam deńgeıinde ata-analar men muǵalimderdiń birlesken ata-analar qaýymdastyǵyn qurýdy usynamyn. Bul ata-analar qaýymdastyǵy bizdiń sanaly urpaq tárbıeleýimizge septigin tıgizer edi«, - dedi ol.
