Mektep oqýshysy órtti dybyspen óshirý qurylǵysyn qurastyrdy
ASTANA. QazAqparat - Atyraý qalasyndaǵy Nazarbaev zııatkerlik mektebiniń oqýshysy Abaı Loran Álmuhambetov otty dybyspen óshiretin qurylǵyny qurastyryp shyqty, dep habarlaıdy QazAqparat tilshisi.
«Men joǵary amplıtýdaly dybys tolqyndary arqyly órtti sóndire alamyn. Osy qurylǵynyń ereksheligi sol, dybys tolqyndary órttiń aınalasyndaǵy aýany taryltyp, ottegini azaıtady. Al ottegi bolmasa, ot jana almaıdy», - dedi Abaı Loran QazAqparat tilshisine bergen suhbatynda.
Atyraýlyq oqýshy óz jobasyn «Uly Dala muragerleri» atty kórme aıasynda tanystyrdy. Ol jerde Nazarbaev zııatkerlik mektepteriniń jetistikteri alǵash ret kórsetildi. Kórme aıasynda ulttyq qolóner, kórkemsýret, gobelen, panno jáne taǵy basqa qoldanbaly óner salasyndaǵy mektep oqýshylarynyń óz qolymen jasaǵan buıymdary, sondaı-aq robototexnıka, ǵarysh, munaı-gaz, ınfraqurylym jáne óńdeý ónerkásibi boıynsha oılap tapqan jobalary tanystyryldy. Shara aıasynda muǵalimderge arnalǵan sheberlik sabaqtary da uıymdastyryldy. Máselen, Atyraý qalasyndaǵy Nazarbaev zııatkerlik mektebiniń taǵy bir oqýshysy Sáttiǵalı Joldasbaı óz atasyna «aqyldy taqııany» jasap berdi. Al Semeıdegi Nazarbaev zııatkerlik mektebiniń oqýshysy Ádil Ordaev óz robottaryn «Qara jorǵaǵa» bıletkizip qoıdy .
Aıta keteıik, órtti dybyspen óshirý tehnologııasyn osydan eki jyl buryn AQSh-tyń Djordj Meıson atyndaǵy ýnıversıtettiń stýdentteri de tanystyrǵan. Olar osy eldiń qorǵanys salasyndaǵy ǵylymı-zertteý agenttiginiń (DARPA) beınebaıanyn negizge aldy.
