Mektep oqýshysy muz astyna túsip ketken balalardy qutqardy
ASTANA. QazAqparat - Reseıdiń Kýrsk oblysy Kornevskıı aýdanyndaǵy Plodosovhoznyı orta mektebiniń onynshy synyp oqýshysy TJM-nyń «Sýdan qutqarǵany úshin» medalimen marapattaldy.
Joǵary synyp oqýshysy muz astyna túsip ketken eki balany qutqarǵan, dep habarlady Reseı TJM oblystyq basqarmasynyń baspasóz qyzmetinen.
Keleńsiz jaǵdaı 6 naýryz kúni oryn aldy. Birinshi jáne úshinshi synyptyń eki oqýshysy jergilikti sý qoımasyna baryp, muz astynda júzip júrgen balyqtardy kórmek bolǵan.
Juqa muz jarylyp, balalardyń bireýi sýǵa túsip ketken. Ony qutqarmaq bolǵan ekinshisi de qolyn sozǵan kúıi qulaǵan. Sol mańǵa taıaý jerde júrgen Ilıa Ilıashenko kómek suraǵan daýystardy estigen boıy muz ústimen júgirip baryp, sýǵa sekirgen. Ol qaltyraǵan oqýshylardy ustaǵan qalpy muzdy jaryp, jaǵaǵa qaraı júzgen. Taıazdaý jerde Ilıa taban tirep, balalardy sýdan alyp shyqty.
Erlikke toly isi úshin ol «Sýdan qutqarǵany úshin» medalimen marapattaldy. Sonymen birge, óziniń osy batyldyǵy úshin Ilıa Ilıashenko qurmet gramotasy men mekteptiń pedagogtar ujymynyń atynan jańa smartfonǵa ıe boldy.
