Mektep oqýshysy bank klıentterine yńǵaıly mobıldi qosymsha jasady

ALMATY. QazAqparat - Almaty qalasy fızıka-matematıka baǵytyndaǵy Nazarbaev zııatkerlik mektebiniń 11 «M» synyp Lıýbov Dýdchenko «Baiterek hackathon - 2019» ınnovatsııalyq jobalar baıqaýynda «Úzdik IT-joba» nomınatsııasy boıynsha birinshi oryndy jeńip aldy, dep habarlaıdy QazAqparat.

Óz jobasyn júzege asyrý úshin Lıýbovqa uıymdastyrýshylar tarapynan 1 000 000 teńgelik sertıfıkat berildi.

Hakatonǵa qatysýǵa 550-den astam ótinim kelip tússe, onyń 200-den astamy ǵana irikteýden ótken. Respýblıkalyq baıqaýdyń fınaly 29 qarasha men 1 jeltoqsan aralyǵynda «Qazaqstannyń turǵyn úı qurylys jınaq bankiniń» uıymdastyrýymen, «Báıterek» Ulttyq basqarýshy holdıngi men «QazTech Ventures» kompanııasynyń qoldaýymen Almaty qalasynda ótti.

«Baıqaýdyń basty maqsaty – joba ázirleýshiler men bıznes-ınvestorlar arasyndaǵy alshaqtyqty joıý» deıdi uıymdastyrýshylar. Olar hakaton qatysýshylaryna bank klıentteriniń úıden shyqpaı-aq, qyzmetti onlaın alýynyń baǵdarlamalyq jasaqtamasyn oılap tabýdy usyndy. Qatysýshylardyń usynǵan sheshimderi tıimdi, qarapaıym jolmen júzege asatyn jáne klıentter úshin túsinikti bolýy tıis degen talap qoıylǵan.

Lıýbov Dýdchenko joba boıynsha seriktesteri Ilıas Ahmetov jáne Esentaı Qurmanbaevpen birge bank úshin salymshy bonýstaryn jınap, óziniń vırtýaldy úıin qurastyra alatyn mobıldi qosymsha ázirlep shyǵarǵan.

«Bul bank klıentteri salymynyń qarqynyn arttyrýǵa kómektesedi. Sonymen qatar, bul qosymshada jeke kýálikti skanerleýdiń arnaıy fýnktsııasy bar. Onyń kómegimen banktegi kezekti qysqartýǵa bolady, sebebi saýalnama toltyrý jáne klıentterdiń málimetterin derekter bazasyna jiberý avtomatty túrde júrgiziledi», - deıdi Lıýbov.