Mektep oqýshylarynyń jazǵy, qysqy demalystaryna eshqandaı ózgeris engizilmeıdi - BǴM
ASTANA. QazAqparat - Mektep oqýshylarynyń jazǵy, qysqy kanıkýl merzimderi esh ózgermeıdi. Búgin Májilistiń Áleýmettik-mádenı damý komıtetiniń keńeıtilgen otyrysynda Bilim jáne ǵylym vıtse-mınıstri Esenǵazy Imanǵalıev osylaı málimdedi.
Eske sala keteıik, basqosýda bastaýysh bilim berýdiń memlekettik jalpyǵa mindetti standarttary máselesi talqylanǵan bolatyn.
«Mekteptegi jazǵy, qysqy kanıkýl merzimderin ózgertý máselesine kelsek, pedagogıkalyq ata-analar qaýymdastyǵynyń pikirlerin eskere kele, biz mektepterdiń qazirgi jazǵy, qysqy kanıkýl merzimderin ózgertý orynsyz dep sanaımyz», - dedi jıyn barysynda vıtse-mınıstr E. Imanǵalıev.
Eske sala keteıik, mektep oqýshylarynyń jazǵy demalys qurylymyn ózgertý máselesi osydan birneshe jyl buryn, dálirek aıtsaq Baqytjan Jumaǵulovtyń mınıstrlikke basshylyq jasaǵan ýaqytynan beri talqylanyp keledi. Tipti, sol kezdegi vedomstvo basshysy álemdik tájirıbeni, kanıkýl merzimin qysqartýdyń artyqshylyqtaryn eskerip, ondaı ózgeristerdi de joqqa shyǵarmaǵan bolatyn.
Al búgingi Bilim jáne ǵylym mınıstri Aslan Sárinjipov óziniń ustanymyn bildire kele, Qazaqstanda jazǵy kanıkýl merzimderi qysqarmaıtynyn atap ótken bolatyn.
