Mektep oqýshylarynyń Respýblıkalyq olımpıadasynda Astana komandasy І oryn aldy
ASTANA. 18 naýryz. QazAqparat - Astanalyq mektep oqýshylary komandasy Respýblıkalyq olımpıadada matematıkalyq baǵyttaǵy jalpy bilim beretin pánder boıynsha «Úzdik komanda - 2013» ataǵyn jeńip aldy.
Bul týraly astana.kz saıtyna qalalyq Bilim basqarmasynan málim etti.
Astana oqýshylary jeti jyl qatarynan Respýblıkalyq olımpıadada kósh bastaýda.
Bıylǵy jyly matematıkalyq baǵyttaǵy pánder boıynsha olımpıada Taldyqorǵan qalasynda naýryzdyń 12-sinen 18-ne deıin ótti. Oǵan elordanyń jalpy orta bilim beretin mekemelerinen 47 oqýshy qatysty. Olardyń 26-sy medal, gramotalarmen marapattaldy. Astanalyq oqýshylardyń 7-ýi - birinshi, 9-y - ekinshi jáne 10-y úshinshi orynǵa ıe boldy.
«2013 jyly olımpıada óte qıyn ótti. Ásirese, matematıka pániniń tapsyrmalary kúrdeli boldy. Alaıda, bizdiń balalar bul pán boıynsha ózderiniń tereń bilimderin kórsetip, 2 birinshi oryndy ıelendi. Sonymen qatar, astanalyq oqýshylar geografııadan -3, fızıkadan 1 «altyn» aldy», - dedi astana.kz saıtyna «Astana daryny» ǵylymı-tájirıbelik ortalyǵynyń dırektory Maıra Qurmanbaeva.
Ortalyq dırektorynyń aıtýynsha, 25-i men 30 naýryz aralyǵynda Taraz qalasynda mektep oqýshylary Respýblıkalyq olımpıadasynyń ekinshi kezeńi ótedi. Bul joly balalar gýmanıtarlyq pánder boıynsha jarysqa túsedi. Olımpıadaǵa Astana qalasy jalpy bilim beretin mektepteriniń 40-tan astam daryndy balasy qatysady.
