Mektep oqýshylarynyń basym bóligi ulttyq mýzyka muralarynan maqurym qalyp jatyr - A. Musaqojaeva
ASTANA. QazAqparat - Mektep oqýshylarynyń basym bóligi ulttyq mýzyka muralarynan maqurym qalyp jatyr. Bul týraly búgin Parlament Senatyndaǵy kezdesý barysynda Qazaq Ulttyq óner ýnıversıtetiniń rektory Aıman Musaqojaeva málim etti.
«Ulttyq biregeılik óskeleń kezden bastap qalyptasady. Sondyqtan da, memleket halyqtyń bos ýaqytyn tıimdi, ónerge qoljetimdi sharalarmen qamtamasyz etý úshin dotatsııalyq qadamdarǵa barýy kerek. Shyǵarmashylyq úıleri, mýzyka úıirmeleri ashylsa, ol halyqqa qoljetimidi bolsa ıgi edi. Qazaqstanda 357 balalar óner mektebi bar, oǵan mýzykalyq mektepter, balalar óner mektepteri de kiredi. Al osy mektepter qamtıtyn balalar sany 100 myńnan asady. Sonda qalǵan balalardyń barlyǵynda derlik ónerge jaqyn bolýǵa eshqandaı múmkindik bolmaı otyr, olar ónerdi qabyldaı almaıtyn jaǵdaıda», - dedi A. Musaqojaeva.
Onyń aıtýynsha, jalpy bilim beretin mektepterde oqıtyndardyń basym bóligi ulttyń asa baı mýzykalyq jáne basqa da óner muralary jaıly bile bermeıdi. Qazaqstan mádenıetiniń tarıhyn da jetkilikti bilmeıdi. «Sondyqtan da, mektepterde fakýltatıvtik qosymshalardy ashý kerek. Balalar óz ultynyń baı muralarynan nár alyp ósýleri kerek», - dedi A. Musaqojaeva.
