Mektep oqýshylarynan bastap, memlekettik qyzmetshige deıin esirtkige táýeldilikke qatysty mindetti testileýden ótkizý kerek - ІІM
ASTANA. 13 qańtar. QazAqparat - Esirtkige táýeldilik testisin mektep oqýshylarynan bastap, memlekettik qyzmetshige deıin erikti nemese mindetti túrde engizý kerek. Búgin Parlament Májilisinde ótip jatqan Úkimet saǵaty barysynda baıandama jasaǵan QR Іshki ister mınıstri Qalmuhanbet Qasymov osyndaı pikir bildirdi.
Baıandama barysynda mınıstr qazirgi tańda halyqtyń esirtkige táýeldilik deńgeıi kóńil kónshiterlik jaǵdaıda emes ekenin atap ótti. Máselen, densaýlyq saqtaý organdarynda esepte qyryq myńnan astam esirtki tutynýshy, sonyń ishinde úsh myń áıel men 1,7 myńǵa tarta kámeletke tolmaǵan balalar tur. «Alaıda, sarapshylardyń aıtýynsha, esirtkige shaldyqqandardyń sany resmı statıstıkadan áldeqaıda alshaq. Sondyqtan da, biz nashaqorlyqty erterek aldyn alýyn zańnamalyq retteý máselesin pysyqtaǵymyz keledi. Bul rette oqýshylar men stýdentterdi mindetti ne bolmasa erikti túrde testileýden ótkizý týraly sóz bolyp otyr. Memlekettik qyzmetshilerdi, sonymen birge qaýiptilik deńgeıi joǵary mamandyqtar boıynsha jumysshylardy jumysqa qabyldaý kezinde mundaı testileýdi engizý tıimdi bolmaq», - deıdi mınıstr Q. Qasymov. Budan bólek, vedomstvo basshysy esirtkige táýeldi adamdardy emdeý jáne ońaltý júıesiniń tıimsiz ekenin ári damymaı otyrǵanyn da tilge tıek etti. «Narkologııalyq mekemelerde qazir esirtkige jáne ishimdikke salynǵan adamdar emdelýde. Bularda maskúnemder men nashaqorlardy májbúrlep emdeýge arnalǵan toǵyz mamandandyrylǵan narkologııalyq aýrýhana jáne óz erkimen emdelýge arnalǵan qarapaıym aýrýhanalarda jıyrma narkologııalyq bólimshe bar. Sondyqtan, medıtsınalyq áleýmettik ońtaılandyrýdyń arnaıy ortalyqtaryn tek esirtkige táýeldi adamdar úshin qurý qajettiligi týyndap otyr», - deıdi ol.
