Mektep oqýshylaryna kompıýter satyp alýǵa kómektesetin aktsııa ótedi
NUR-SULTAN. QazAqparat - Mektep oqýshylaryna qashyqtan oqýǵa múmkindik beretin kompıýterlik tehnıkany satyp alýǵa arnalǵan «OQY'SHYNY QOLDA!» Respýblıkalyq qaıyrymdylyq aktsııasy bastalady. Bul týraly OKQ ótken onlaın-baspasóz konferentsııasynda QR Bilim jáne ǵylym mınıstrligi Balalardyń quqyqtaryn qorǵaý komıtetiniń tóraǵasy Esenǵazy Imanǵalıev aıtty, dep habarlaıdy QazAqparat tilshisi.
«QR Bilim jáne ǵylym mınıstrligi «Atameken» Ulttyq kásipkerler palatasymen, sondaı-aq «Meniń Atamekenim» qoǵamdyq birlestigimen birlesip «Mektepke jol» qoǵamdyq qozǵalysy aıasynda «OQY'SHYNY QOLDA!» Respýblıkalyq qaıyrymdylyq aktsııasyn bastady. Aktsııa kompıýterlik tehnıkany, noýtbýkterdi, planshetterdi satyp alýǵa jáne ony qaıtarymdy negizde muqtaj stýdentterge berýge baǵyttalǵan. Kompıýterlik jabdyq demeýshiler, metsenattar, eriktiler arqyly satyp alynady. Aktsııa sonymen qatar, balalar men jekelegen sanattaǵy otbasylarǵa joǵary jyldamdyqty ınternetke qol jetkizýdi qamtamasyz etýge baǵyttalǵan», - dedi Esenǵazy Imanǵalıev.
Sonymen qatar, ol barlyq qazaqstandyqtarǵa, otandyq kásiporyndar men kompanııalarǵa úndeý tastap, barlyǵyn aktsııaǵa qatysýǵa jáne balalarǵa qashyqtan oqytýǵa kómektesýge shaqyrdy.
«Mınıstrlik mektepterde monıtorıng júrgizip, aqyly jabdyqty alýda basymdyqty anyqtaý kezinde eskeriletin ólshemderdi atady. Áleýmettik az qamtylǵan otbasy balalary men jetim balalarǵa kómek kórsetiledi. Aktsııa aıasynda jabdyqqa tapsyrys berý úshin qoldau.edu.kz arnaıy saıty iske qosyldy. Sondaı-aq, AÁK almaǵan, tabysy kúnkóris deńgeıinen tómen, ata-anasy múgedek nemese jalǵyz basty, kópbalaly otbasylardyń balalaryna kómek kórsetiledi», - dep tolyqtyrdy komıtet tóraǵasy.
