Mektep oqýshylaryna arnalǵan eki bilim platformasy birigip jatyr
Ortalyq kommýnıkatsııalar qyzmetindegi baspasóz máslıhatynda bilim berý platformalaryn biriktirýge qatysty suraq qoıyldy.
Óz kezeginde «Daryn.online» bilim berý platformasynyń ókili Erjan Ońalbaev qazirgi kezde júıeni qoldanýshylar úshin platformanyń kóptigi qolaısyzdaý bolyp turǵanyn jetkizdi.
«Ortasha eseppen bir mektepte 4-5 platforma bar. Muǵalimder men oqýshylar ár platformanyń logıni men qupııa sózin este saqtaýy kerek. Bul óz kezeginde yńǵaısyzdý bolyp otyr. Osy oraıda «Daryn.online» men Kundelik.kz platformasy birigip, ıntegratsııa jasap jatyrmyz. Ol qazan aıynyń basynda daıyn bolady. Bul ıntegratsııa bizge jáne jelini qoldanýshylarǵa ne beredi? Osy rette bir logın ári qupııa sózben «Daryn.online» men Kundelik.kz platformasyna birden kirýge múmkindik beredi», - dep túsindirdi E. Ońalbaev.
Onyń sózine qaraǵanda, aldaǵy ýaqytta «Daryn.online» platformasynda beıne sabaqtardy kórip bolǵan soń, test oryndalady. Sonda jınalǵan upaılar Kundelik.kz platformasynda kórinip turady.
